Bejaarde gou ondersoek ná ‘verkragtings’
2009-12-23 04:22
- Artikelopsies
- Deel
- Kry Beeld op
Die 77-jarige Krugersdorpse vrou wat glo oor ’n tydperk van jare deur ’n loseerder verkrag en met die dood gedreig is, sal Maandag deur ’n mediese spesialis ondersoek word.
Die polisie het eergister by haar huis toegeslaan nadat ’n besorgde kerklidmaat hulle genader het. Die vermeende verkragter het in die dak gaan wegkruip. Hy het sy polse gesny en hom in die maag geskiet terwyl die polisie met hom onderhandel het om hom oor te gee.
Die man het glo vroeër gedreig om die vrou blind en doof en selfs dood te maak as sy enigiets oor sy toenadering en seksuele dade sou sê.
Kapt. Jacob Raboroko, polisiewoordvoerder, het gister by navraag bevestig die vrou het nog nie mediese ondersoeke ondergaan nie omdat die laaste beweerde voorval van verkragting meer as ’n week gelede plaasgevind het.
“Daarom sal sy eers die komende week ’n spesialis gaan sien.”
Die vrou het nie kinders nie en ly aan emfiseem. Volgens die polisie ontvang sy traumabehandeling deur haar kerk.
Die vermeende verkragter is in ’n bestendige toestand in die Leratong-hospitaal.
“Hy word steeds streng bewaak,” het Raboroko bevestig.
Die saak sal vandag op die hofrol in die Krugersdorpse landdroshof geplaas word, maar die man sal nie verskyn nie. – Amanda Roestoff
- Beeld