Belastingbetaler dok op vir Cele se eis teen koerant

Kaapstad. – Belastingbetalers sal genl. Bheki Cele, die nasionale polisiehoof, se regskoste betaal in sy geding teen die Sowetan-koerant.

Dit kan miljoene rande wees.

Die geskorste polisiehoof eis R200 000 in ’n lastersaak teen die Sowetan en die joernalis Mhlabunzima Mamela omdat dié koerant in 2007 ’n gemanipuleerde foto van hom gepubliseer het en glo valslik berig het dat hy die woorde “shoot to kill” gebruik het.

Op dié foto staan Cele in ’n lang jas met ’n haelgeweer in sy hand en met ’n Stetson-hoed op sy kop.

Luidens die oorspronklike berig het die polisie agt verdagtes doodgeskiet tien dae nadat Cele gesê het polisielede moet vir die kop mik.

Cele het vroeër getuig dié berig laat dit lyk of hy beveel het die polisie moet dié agt verdagtes doodskiet, “wat ek nooit (gesê) het nie”.

Die KwaZulu-Natal-regering sê hulle moet die rekening betaal omdat die regering in die saak betrek word, maar Cele se hofstukke betrek egter nié die provinsie waar hy vroeër LUR van vervoer was nie.

Me. Debbie Schafer, DA-LP en -woordvoerder vir justisie, sê dit is “absoluut onaanvaarbaar” dat die belastingbetaler moet opdok.

“Daar is geen twyfel dat die provinsiale regering die regskoste dra in Cele se private hoedanigheid nie. Dit is ’n skande.”

Schafer sê dit is nog te vroeg om te bespiegel wat presies die omvang van die regskoste sal wees.

“Dit hang af van hoe lank die saak neem en wie sy regsverteenwoordigers is,” het sy gesê.

Die saak het aanvanklik gesloer, maar nou dat Cele heeltyds geskors is, is die saak weer hoog op die agenda.

Die saak hervat in Junie.

Sluit aan by Beeld se Facebook-bladsy en volg Beeld op Twitter