Besluit buite die hof, sê vervolger

Meer pleit- en vonnis­ooreenkomste moet tussen die staat en misdadigers gesluit word sodat hoftyd eerder aan ernstiger sake bestee kan word.

So het adv. Menzi Simelane, nasionale direkteur van open­bare vervolging, eergisteraand in die Nasionale Biblioteek in Pretoria gesê.

Simelane se openbare lesing was die eerste in ’n reeks wat die biblioteek jaarliks gaan aanbied oor verskeie onderwerpe as deel van ’n nasiebou-inisiatief.

Simelane het gepraat oor die transformasie van die regbank sedert 1994.

Hy het gesê daar is verskeie prosesse waarin transformasie nodig is.

Pleit- en vonnisooreenkomste spaar die howe tyd omdat ver­hore nie gehou hoef te word nie.

Net moeilike sake behoort verhoor te word en talle sake staan tou vir hoftyd.

Dit is belangrik dat regspraktisyns hul kliënte behoorlik begin adviseer hieroor, “in teenstelling daarmee om die hof se tyd te mors”, het hy gesê.

Dié ooreenkomste dui op ’n behoorlike administrasie van geregtigheid.

Simelane het gesê minstens 52% van sulke ooreenkomste word in gevalle van ekonomiese oortredings gesluit en dit bring nie tronkstraf mee nie.

In die algemeen word gesê ekonomiese misdadigers behoort nie tronk toe te gaan nie.

“Daar is meriete in dié argument.

“Die tronk is net vir die heel ernstigste misdade.”

Simelane het gesê daar is steeds voorsittende beamptes wat “probeer” om die ou Strafproseswet toe te pas en nie die nuwe een nie.

Hy het voorts gesê van nou af word afsonderlike prosedures gevolg vir kinders wat met die gereg bots.

Hulle gaan nie tronk toe nie, behalwe vir uiters ernstige misdade, maar word in programme buite die tronk geplaas.

3 300 sake teen kinders is in dié tydperk só herlei. Die regering het dus “gereageer” vir kinders.

“Dalk is dit tyd vir ’n proeftydperk-stelsel (buite die tronk) vir eerste oortreders ná minder ernstige oortredings.”