Boer sterf, vrou ernstig gewond toe 2 toeslaan
2010-01-23 02:22
- Artikelopsies
- Deel
- Kry Beeld op
Middelburg. – ’n Boer (59) is dood en sy vrou ernstig gewond in ’n plaasaanval gisteroggend net buite dié dorp in Mpumalanga.
Mnr. Johan Venter is in die kop geskiet. Sy vrou, Rentia (60), is in die maag en arm gewond. Sy was teen gister in ’n ernstige, maar stabiele toestand in die Life Health Midmed-hospitaal in Middelburg.
Die voorval het in die vroeë oggendure op die Venters se plaas, Keerom, aan die Stofbergpad plaasgevind.
Die aanvallers, twee mans, het by die huis ingekom deur een van die hoofslaapkamer se vensters oop te dwing.
Volgens insp. Lize Coetzee, woordvoerder van die Middelburg-polisiestasie, was die Venters se seun, Jaco (22) in sy kamer.
Hy het sy pa hoor skree en toe ’n skoot gehoor.
Sy ma het begin gil, waarna nog skote geskiet is.
“Hy het na die kamer gestorm en sy ouers daar gevind,” het Coetzee gesê.
Die aanvallers het toe glo reeds gevlug.
Dit is nie bekend watter vuurwapen in die aanval gebruik is nie.
Niks word vermis nie.
Niemand is nog teen druktyd aangekeer nie.
- Beeld