Bok-krisis; Div bly
2010-09-05 22:20
Kaapstad. – Springbokrugby is ’n jaar voor die Wêreldbekertoernooi in ’n krisis, maar Peter de Villiers, die Bok-afrigter, se kop gaan straks nie rol nie.
Terwyl baie Springbok-ondersteuners ná die Springbokke se vyfde nederlaag in ses wedstryde De Villiers se kop eis, was die Suid-Afrikaanse Rugbyunie (Saru) gister berekend in sy reaksie.
Die Wallabies het die Springbokke in ’n Driesnasieswedstryd in Bloemfontein met 41-39 geklop nadat die besoekers in ’n stadium met 31-6 voor was.
Dit is die Australiërs se eerste oorwinning oor die Springbokke in 77 jaar in Bloemfontein.
Ondanks die publiek se misnoeë oor die Bokke, sê Saru bloot daar sal ’n “standaard- prestasie-oorsig” wees waarin die Springbokke se flou vertonings vanjaar onder die loep geneem word.
“Alle rugbyliefhebbers sal baie teleurgesteld wees met die uitslae in vanjaar se Drienasiesreeks en dieselfde geld natuurlik die Springbokspan en sy bestuur,” het mnr. Oregan Hoskins, Saru se president, gesê.
“Ons beskou die situasie in ’n baie ernstige lig, maar daar is ’n proses wat gevolg moet word en ons gaan dit deurvoer.”
Die Bokke moet oor ’n jaar hul wêreldtitel in Nieu-Seeland verdedig.
Emosies het eergister in Bloemfontein hoog geloop, met die Bok-afrigtingspan van De Villiers, Dick Muir en Gary Gold wat deur die skare uitgejou is.
Bryan Habana, wat in 2007 nog die Internasionale Rugbyraad se speler van die jaar was, is uitgejou vir sy blapse en het soms sarkastiese applous ontvang wanneer hy nie droogmaak nie.
Saru het in ’n verklaring gesê hy sal ook “formele gesprekke” met De Villiers voer oor van sy openbare uitsprake.
De Villiers het verlede week ’n storm ontketen deur die Bok-span se steun aan die Blou Bul-stut Bees Roux, wat van moord op ’n Tshwane-metropolisie beampte aangekla word, toe te sê.
Hoskins het intussen aan die polisieman se familie geskryf om Saru se “ondersteuning en meegevoel” oor te dra.
Suid-Afrika het sedert hy verlede jaar die Drienasies-titel verower het net ses uit 13 toetse gewen.
Die Bok-span wat eergister teen Australië verloor het, was in terme van toetse gespeel ook die mees ervare in Suid-Afrika se geskiedenis.
Dit het Australië net 25 minute geneem om ’n bonuspunt vir vier drieë te kry.
Die 22 drieë wat Suid-Afrika in vanjaar se toernooi afgestaan het, is die meeste in die geskiedenis van die toernooi.
“Dit was net te maklik vir hulle om aan te val en hulle het sonder enige moeite deur ons verdediging gekom,” het John Smit, die Bok-kaptein, ná die wedstryd gesê.
“Ek kan baie verskonings bied, maar jy doen dit net wanneer jy tweede kom. Ons is nie op ons beste nie en het baie werk om te doen.”
Vanjaar se reeks sal veral onthou word vir die skokkende verdediging deur die Springbokke.
Hulle was die bonuspunt-melkkoeie in die reeks en het in net een wedstryd nié bonuspunte afgestaan nie, berig JJ Harmse (berig op bl. 24).
Die oud-Springbokkaptein Wynand Claassen het die Springbok-span se vertonings as “treurig” beskryf, berig Retha Grobbelaar.
“Daar is groot name, maar wat help dit? As jy hulle ervaring in ag neem is dit die slegste Springbok-span in die geskiedenis. ’n Mens verwag meer.
“Dit lyk nie meer of daar passie is nie,” het Claassen gesê.