Boom val DBV-hut in sy maroela
2009-11-16 22:37
’n Enorme maroelaboom het eergisteraand die kantoor van die plaaslike tak van die Dierebeskermingsvereniging (DBV) in Barberton platgeval.
Dié knewel van ’n boom het personeel se toegang gisteroggend tot die perseel bemoeilik omdat dit die hek versper het.
Die kantoor was ’n houthut. ’n Sterk wind het die ou boom vermoedelik omgewaai.
“Die hut is verpletter, maar verbasend genoeg staan die lessenaar nog met die boom daar bo-op,” het me. Margaret Nieuwenhuis, DBV-voorsitter en inspekteur, vertel.
“Ons het die papiere wat gered kon word nou in die stoorkamer gepak en sal maar vir eers van daar af moet werk.”
Volgens Nieuwenhuis is die diere se hokke ongedeerd, maar versper die boom voertuigtoegang tot die hokke.
“Ons kan die diere versorg, maar kan byvoorbeeld nie tot by ’n hok ry om ’n dier in of uit te laai nie.”
Die DBV-bestuur het die munisipaliteit reeds gevra om die boom op te saag en te verwyder. Dit is egter nog onduidelik wanneer dit sal gebeur.
Dié DBV-tak kan gekontak word deur e-pos na margaret@soft.co.za te stuur.