Brandstof kan gou te min wees

’n Landwye tekort aan brandstofprodukte weens verouderde infrastruktuur is ’n on­mid­del­like moontlikheid as die staat en ander rolspelers nie gou die probleem takel nie.

Die meeste van Suid-Afrika se raffinaderye is in die 1960’s gebou en die petroleumbedryf verkeer onder konstante druk wat nie gou opgelos gaan word nie.

So sê mnr. Peter Noke, nasionale direkteur van die Suid-Afrikaanse Petro­leum-kleinhande- laarsvereniging ­(Sapra). Hy sê die bedryf is sedert November verlede jaar onder druk ná beplande en onbeplande instandhouding by die Sapref- en Enref-raffinaderye in Durban.

“Dit is egter net een van ’n aantal probleme in die bedryf.”

Hy het gewaarsku dat veral kleiner vulstasies op die platteland in die nabye toekoms hul deure sal moet sluit.

Daar is ook ’n tekort aan bitumen, ’n byproduk in die vervaardiging van brandstofprodukte wat vir padbou gebruik word.

Noke sê die brandstofbedryf is duur en kompleks met baie rolspelers, soos die departement van energiesake, die Nasionale Energiereguleerder (Nersa), Transnet, die Suid-Afrikaanse petroleumbedryfsvereniging (Sapia) en Prasa.

“Ons infrastruktuur het nie tred gehou met ontwikkeling nie.” Hy het gesê daar is ’n twis tussen rolspelers oor wie verantwoordelikheid moet neem vir die bou van nuwe raffinadery en brandstofdepots. Dringende samesprekings word gehou om verdere tekorte te verhinder.

Mnr. Phillip Hechter, besturende direkteur van Much ­Asphalt – Suid-Afrika se grootste kommersiële verskaffer van asfaltprodukte, het gesê redes vir dié tekort is probleme by raffinaderye. Hy het gesê veral kleiner ondernemings sukkel.

“Lughawens en nasionale paaie kry voorkeur.

Tegnologie word ontwikkel om soveel as moontlik brandstofprodukte uit ruolie te kry. Bitumen is slegs 1% van die eindproduk en soos daar oorgeskakel word na skoon brandstof met laer swaelvlakke, gaan die situasie vererger.”