‘Broekloses’ se pretrit loop skeef
2011-01-10 23:28
- Artikelopsies
- Deel
- Kry Beeld op
Die organiseerders van die “eerste jaarlikse geen-broek-Gautrein-rit” het ’n regsmening ingewin oor die manier waarop hulle eergister op die Kempton Park-stasie gehanteer is.
’n Klompie mense se broeklose pretrit (net in sjoebroekies en bokser-onderbroeke) het ’n rit na die polisiekantoor geword toe die owerhede besluit het hulle vang “iets onwettigs aan”.
Maar toe hulle by die polisiekantoor aankom, het niemand geweet waarvan die 34 mense wat gearresteer is, nou eintlik aangekla moet word nie, het mnr. Kuba Granicki vertel.
Granicki was een van sowat 100 mense wat eergister sy broek laat waai het. Dié geleentheid is deur mnr. Ben Pienaar (32) op Facebook gereël in reaksie op ’n uitnodiging aan mense wêreldwyd om ’n stoute treinrit mee te maak ter herdenking van die eerste broeklose treinrit in New York tien jaar gelede.
Die groep mense het omstreeks 15:00 by die Rhodesfield-stasie in Kempton Park bymekaargekom om na die Sandton-stasie toe en terug te ry.
Toe die deure toegaan, het hulle soos een man opgestaan, hul broeke uitgetrek en dit in hul handbagasie geprop.
“Dit was verskriklik snaaks. Almal het weer gaan sit en gemaak of dit die natuurlikste ding op aarde is. Party het boek of koerant gelees en ander het na musiek op hul iPods geluister. Mense het hulle openlik aangestaar en lekker gelag.
“Dit was glad nie onsedelik nie. Die meeste meisies het sjoebroekies gedra, terwyl mans bokser-onderbroeke aangehad het,” het Granicki gesê.
Terwyl hulle op pad terug van Sandton was, het Gautrein-veiligheidswagte die groep “omsingel”. “Toe die trein op Rhodesfield stop, het ons uitgeklim, maar so 34 van ons is teen ’n muur vasgekeer.”
Hulle is geboei en na die Kempton Park-polisiekantoor geneem. Daar het hulle glo drie uur gewag om aangekla te word.
“Hulle wou ons eers van openbare onsedelikheid aankla, maar het toe besef daar wás geen onsedelikheid nie. Toe wou hulle ons van ’n onwettige bymekaarkoms op ’n openbare plek aankla.”
Uiteindelik het die polisie hulle net laat gaan.
Die Bombela- operasionele diens het daarna ’n “boete” van R700 aan elkeen opgelê. Dit kan verminder word tot R350 as dit binne 30 dae betaal word.
Op Granicki se boete staan hy is beboet weens “verkeerde kleredrag”, terwyl ander glo beboet is omdat hulle “ ’n Gautrein-reël oortree” het.
Pienaar het op sy Facebook-profiel gesê hy kry ’n regsmening namens almal.
Dr. Barbara Jensen, woordvoerder van die Gautrein, het gesê dit is “nie die plek” om só iets aan te vang nie.