Bushie en Byleveld gaan nou privaat ondersoek
2010-09-06 22:13
- Artikelopsies
- Deel
- Kry Beeld op
Die afgetrede top-polisiemanne brig. Piet Byleveld en genl.maj. Bushie Engelbrecht gaan hulle nou op private ondersoeke toespits.
Byleveld en Engelbrecht het gister aangekondig hulle gaan spesifieke ondersoeke en korporatiewe projekte vir die private veiligheidsmaatskappy CSS Tactical hanteer.
Byleveld is onder meer daarom bekend dat hy die Sheldean Human-moord opgelos en die ontvoerde me. Leigh Matthews (21) se moordenaar, Donovan Moodley, vasgetrek het.
Lede van die Amerikaanse federale polisiediens (FBI), die Londense metropolisie (Scotland Yard) en die Kanadese en Israelse polisie het al by Byleveld aangeklop om hulp met ondersoeke na reeksmoorde.
Byleveld het in Junie afgetree.
“Die polisie was my passie die afgelope 38 jaar,” het hy gesê.
“Dit sal vir die res van my lewe my missie wees om die boodskap van geregtigheid te verkondig. As ek alles waarin ek glo en verteenwoordig moet opsom in een woord is dit hoop.”
Engelbrecht het onlangs afgetree ná 43 jaar in die polisie.
Hy was 16 jaar oud toe hy by die polisie aangesluit het en het in 2002 die adjunk- provinsiale kommissaris van die polisie se misdaadintelligensiediens in Gauteng geword.
Hy het aan verskeie hoë-profiel-ondersoeke gewerk, onder meer die Shobashobane-moorde in Port Shepstone en die Richmond-moorde in KwaZulu-Natal.
Engelbrecht, wat verskeie polisiepryse ontvang het, het polisie-opleidinghandleidings en ’n boek oor sy ondersoeke na die politieke geweld in KwaZulu-Natal geskryf.
Mnr. Ricky Croock, sakehoof van CSS Tactical, het gesê die ondervinding wat Byleveld en Engelbrecht tot dié maatskappy kan bydra, is onskatbaar.