De Kock ‘oor 2 weke vry’

Kaapstad. – Eugene de Kock staan glo op die punt om sy sel in die Sentrale Gevangenis in Pretoria op te ruim en kan “binne twee weke tot ’n maand” as ’n vry man daar uitstap.

Volgens wye bespiegeling gister onder mense wat nou by De Kock se kwytskeldingsproses betrokke is, het pres. Jacob Zuma tydens ’n ontmoeting met hom in April verlede jaar – waaroor Beeld vroeër vandeesmaand berig het – onderneem om sy aansoek voor einde Januarie af te handel. “Hy kan oor twee weke daar uit wees,” het ’n bron gister gesê.

Sowel mnr. Kevin Woods, ’n vertroueling van De Kock, as past. Philip Kruger, sy geestelike raadgewer, kon nie gister bevestig dat ’n datum vir De Kock se vrylating al bepaal of aan hom oorgedra is nie.

Hulle het dit egter duidelik gemaak ’n verwagting is geskep dat Zuma De Kock binnekort sal begenadig.

De Kock is in Oktober 1996 in die hooggeregshof in Pretoria twee keer lewenslange tronkstraf opgelê en is tot nog 212 jaar tronkstraf gevonnis weens 86 misdrywe, waaronder ses moorde en bedrog.

Die man met die bynaam Prime Evil was van 1985 tot 1993 bevelvoerder van die veiligheidspolisie se berugte C10-teeninsurgensie-eenheid op Vlakplaas.

Woods, ’n oudspioen wat 19 jaar tronkstraf in Zimbabwe uitgedien het, sê De Kock is fluks aan’t planne maak vir ’n lewe buite die tronk, maar dat nog niks finaal is nie.

“Ons is oortuig dit gaan binne dae gebeur. Of dit met Schabir Shaik se kwytskelding verband hou, weet ons nie, maar hy sal dit vat.”

Zuma het volgens Woods gesê hy het in beginsel geen probleem daarmee dat De Kock sy plek in die samelewing inneem nie. “Die oorlog is verby. Mense moet ophou om in die verlede te leef,” het Zuma glo aan De Kock gesê.

Woods sê De Kock het kontak met sy voormalige vrou, Audrey, van wie hy geskei is. Sy het die land in 1994 saam met die egpaar se twee seuns verlaat en woon vermoedelik in Brittanje.

“Hul verhouding is goed, ondanks die afstand. Hulle is destyds noodgedwonge geskei en maak toekomsplanne. Hy sal graag weer ’n goeie verhouding met sy gesin wil hê.”

Woods beskryf De Kock as “’n sterk man met ’n goeie karakter”.

“Hy koester nie wraakgedagtes nie, maar is tog kwaad vir sy bevelvoerders, die generaals en die mense wat in leiersposisies was.”

- Beeld