Dis leuens, sê briesende Vusi Pikoli
2009-11-17 22:38
Adv. Vusi Pikoli, gewese hoof van die nasionale vervolgingsgesag (NVG), het “bedekte beweegredes” gehad om mnr. Jackie Selebi te vervolg.
Selebi het Pikoli gekonfronteer omdat sy vrou miljoene rande se aandele verniet gekry het van ’n maatskappy waarin die Kebble-mynmagnate ’n aandeel gehad het, het adv. Jaap Cilliers SC, vir die oudpolisiehoof, gister in die hooggeregshof in Johannesburg aangevoer.
Kort daarna het Pikoli ’n saak teen mnr. Roger Kebble nek omgedraai, het Cilliers in Selebi se korrupsieverhoor gesê.
’n Woedende en ontstelde Pikoli het gesê “net ’n bose mens kan sulke stories versin”.
Volgens Cilliers het Selebi Pikoli gekonfronteer en het Pikoli emosioneel erken sy vrou is sy “Achilleshiel”.
Pikoli het woedend gereageer: “Ek hoop jy sal ophou om hierdie leuens te herhaal. Jy kan dit ’n duisend keer sê en ek is hier om vir jou te sê dit is nie so nie. Ek stel dit aan jou, advokaat, dat die beskuldigde dit nooit, nooit aan my genoem het nie.”
Cilliers het ook beweer die NVG wou Selebi so graag vervolg dat hulle bereid was om ooreenkomste met moordenaars en allerlei misdadigers te sluit om teen Selebi te getuig.
Pikoli: “Dit was pynlike besluite wat ons geweet het sterk kritiek teen ons gaan ontlok. Maar as ’n land met misdaadsyfers so hoog soos ons s’n kan ons nie ’n nasionale polisiekommissaris hê wat na bewering met misdaad te doen het en by misdaad betrek word nie.
“Ons moet misdadigers teen misdadigers gebruik. Om die top-man te kon vervolg wat mense in die land moes beskerm en ’n eed daaroor geneem het, was dit reg om die ooreenkomste aan te gaan.”
Pikoli het in sy hoofgetuienis vertel hoe die NVG gesukkel het om inligting oor hul Bad Guys-ondersoek, waarin Selebi genoem is, uit die polisie te kry.
Onmiddellik nadat hulle die eerste keer bewerings gehoor het dat Selebi omkoopgeld aanvaar het, het hy dit aan die minister van justisie en die destydse president, mnr. Thabo Mbeki, genoem.
Daarna het Mbeki kommunikasie tussen hulle laat vloei deur self as middelman op te tree of mnre. Mosiuoa Lekota en Ngconde Balfour te betrek.
“Die president het gesê ek moet die saak met Selebi self bespreek en ek het. Hy het my oortuig dat hy nie geld aanvaar het nie. Ek was so verlig. Ek het gesê: ‘Ek glo jou Jackie,’ en ek het gehuil. Hy het ook gehuil,” het Pikoli getuig.
Selebi het hom ook twee DVD-opnames gewys van onderhoude deur komm. Mulangi Mphego, destyds hoof van die polisie se inligtingsdiens, waarin mnr. Glenn Agliotti ontken het dat hy Selebi omgekoop het.
Agliotti het intussen getuig hy het sowat R1,2 miljoen in omkoopgeld aan Selebi gegee.
Mnr. Jurgen Kögl, ’n sakeman, het getuig hy het gehoor geld het van die Kebbles se maatskappy JCI na Selebi gevloei.