Dr. Blade: Dít rig skade aan
2012-02-06 22:02
Voorvalle waar studente en personeel aan die Universiteit van Zoeloeland (Unizulu) kop in een mus by onaanvaarbare praktyke betrokke was, het verwoestende gevolge vir die akademiese statuur en integriteit van die universiteit.
Dít kan nie geduld word nie, het dr. Blade Nzimande, minister van hoër onderwys en opleiding, gister op ’n mediakonferensie in Pretoria gesê waar besonderhede oor ’n forensiese oudit by Unizulu bekend gemaak is.
Nzimande het te velde getrek teen wanpraktyke en korrupsie by enige hoëronderwysinstellings en kolleges.
Nzimande het prof. Chris de Beer, viserektor van die Universiteit van Pretoria (UP), verlede jaar as administrateur by Unizulu aangestel.
Die universiteit het na aanleiding van die oudit met tugverhore teen oortreders begin, terwyl strafregtelike sake nie uitgesluit is nie.
De Beer het gesê daar word tans teen 13 personeellede en twee studente opgetree, maar meer sake kan volg.
Die oudit het bevind “ernstige en herhaalde oortredings” van die universiteit se beleid en prosedures het voorgekom wat betref kwessies soos akademiese administrasie en registrasie van studente, prosesse in die uitreiking van skoon grade en diplomas wat tot die uitreik van vals sertifikate kon lei en toelating van studente wat nie aan die vereistes voldoen nie.
De Beer het gesê die universiteit het die laaste paar jaar miljoene rande aan verkrygingsuitgawes bestee.
“Dit is moeilik om te sê hoeveel verliese daar was en of die universiteit waarde vir geld gekry het.
“Onreëlmatighede het egter deurlopend voorgekom en daar was personeellede en sommige raadslede wat hulself in die proses verryk het deur die verkrygingsdienste aan te vra en uiteindelik self te verskaf.”
Ander onreëlmatighede sluit in studente wat geregistreer is en van wie verwag is om ’n “fasiliteringstarief” van tussen R1 500 en R3 900 te betaal.