Eerste ontsnapping uit private tronk

Twee uiters gevaarlike misdadigers het gisteroggend die eerste gevangenes geword wat uit die private hoëmaksimum-veiligheidstronk Kutama Sinthumule buite Louis Trichardt in Limpopo ontsnap.

’n Groot soektog na die twee mans, wat lewenslange vonnisse weens onder meer moord, verkragting, gewapende roof en aanranding uitgedien het, was teen druktyd nog aan die gang.

Chico Naibe (40) van Zimbabwe en Johannes Antonio Khoza (29) van Mosambiek, het vroeg gisteroggend uit die tronk, wat in 2002 geopen is, ontsnap.

Kapt. Maano Sadike, polisiewoordvoerder in Louis Trichardt, het gesê die twee mans het glo die tralies van hul sel afgesaag.

Mnr. Pieter Jordaan, besturende direkteur van South African Custodial Management (SACM), die maatskappy wat dié gevangenis bestuur, het aan Beeld bevestig “daar is met die tralies gepeuter.”

Volgens hom is dié van Naibe en Khoza die eerste ontspanning by dié tronk.

Jordaan het gesê ’n ondersoek word gedoen om vas te stel waarmee die tralies afgesaag is en hoe die mans verder ontsnap het. Sadike het gesê die mans het glo van hul klere gebruik om oor die hoë draadheinings te ontsnap.

Jordaan het gesê die departement van korrektiewe dienste (DKD) kan SACM met R468 000 vir elke ontsnapte beboet.

Mnr. Manelisi Wolela, woordvoerder van DKD, het aan Sapa gesê SACM moet die ondersoek na die ontsnappings binne twee weke voltooi en terugvoering aan die departement gee.

Sadike het die publiek gemaan om nie die twee ontsnaptes self aan te keer nie aangesien hulle “uiters gevaarlik” is. Kutama Sinthumule is een van slegs twee private tronke in die land. Die Mangaung Correctional Centre buite Bloemfontein is die ander een.

Kutama Sinthumule het meer as 3 000 gevangenes. Sekuriteit by die tronk is baie streng, met meer as 600 CCTV-kameras. ’n Voertuig patrolleer die perseel ook 24 uur per dag. Die gevangenes word vier keer per dag getel en die seldeure word elektronies beheer.

- Beeld