Die rolprentvervaardiger FC Hamman en sy vrou, Annie, het ’n eis
van R2?miljoen ingestel teen onder andere MultiChoice (spesifiek die kanaal
kykNET) en Christo Gerlach, vervaardiger van die kykNET-program Tonge los.
Die geding word op 12 Julie in die hooggeregshof in Johannesburg
aangehoor.
Tonge los is intussen permanent van die
lug verwyder, het me. Karen Meiring, kanaalhoof van kykNET, gister bevestig.
Sy het nie uitgewei oor die rede vir die besluit nie.
Die egpaar het hul eis ingestel nadat Tonge los in een van hul programme “onthul” het dat me.
Hamman ’n pornografiese webwerf bedryf. Haar man is ook betrek. Die egpaar voer
aan hulle is hoegenaamd nie voor die tyd oor die bewerings gekontak nie en dat
dit blatante leuens is.
Bronne in die rolprentbedryf het gesê veral mnr. Hamman is swaar
deur die bewerings getref omdat hy juis besig is met die vervaardiging van ’n
gospelrolprent getiteld Angus Buchan’s Ordinary People.
Hamman het gister bevestig dat hy en sy vrou die eis ingestel het.
“Hoewel ons maar klein mensies is in vergelyking met die korporatiewe reus
MultiChoice, met baie diep geldsakke, het ons besluit ons wil ons naam in ere
herstel.”
Meiring het bevestig dat die egpaar se eis ontvang is. “Dit is nou
in ons regsadviseurs se hande.” .Bruin