‘Els het net twee rolle in Robbie se lewe: pa en regisseur’
2009-11-13 22:30
- Artikelopsies
- Deel
- Kry Beeld op
Jeanne-Marié Versluis en Sapa
As Jurie Els in sy verhoor sal moet getuig, sal hy sê Robbie Klay se bewerings teen hom is versinsels en dat Klay oor die beweerde seksdade tussen hulle jok.
So het adv. Danie Dorfling, namens Els, gister in die hooggeregshof in Pretoria vir Klay gesê voordat hy die dae lange deurtastende kruisondervraging van die jong sanger voltooi het.
Klay het geantwoord hy weet wat die waarheid en wat ’n leuen is.
Waarnemende regter Chris Eksteen het gesê: “Ja, maar ons weet nie wat die waarheid is nie.”
Klay het geantwoord dit (die seksvoorvalle) is die waarheid.
Dorfling het gesê Els sal aanvoer hy het net twee rolle in Klay se lewe vervul: as die pa wat Klay nooit gehad het nie en as uitvoerende regisseur van sy albums. Hy (Els) het ’n jong seuntjie in ’n bekende ster verander.
Dorfling het gister gesê die enigste seksvoorval tussen Klay en Els waaroor Klay ’n dagboek-inskrywing het, was glo op 11 Februarie 1999.
Hy het Klay gevra waar dié toe op skool was. Klay het getuig hy was toe in (die destydse) st.?6 in die Pro Arte-kunsskool in Pretoria.
Dorfling het gevra of dit goed was vir Klay om toe in die skooltermyn by ’n splinternuwe kuns- en dramaskool “twee daggies” saam met Els na Vrede te gaan.
Klay het geantwoord dat hulle oor ’n naweek in Vrede was.
Dorfling het egter gesê 11 Februarie 1999 was op ’n Donderdag.
Klay het geantwoord “daar moes ’n rede wees” hoekom hy saam met Els na Vrede sou gaan.
Volgens Klay is hy en Els toe na die woonstel langs die huis op ’n plaas by Vrede. Hulle het ’n seksdaad gehad, gestort en in die bed teruggeklim.
Dorfling het gister ’n afskrif van ’n predikant se dagboek-inskrywing vir 11 Februarie 1999 aan die hof voorgehou.
Daarvolgens het ds. Johan Els dié aand saam met Jurie Els en Klay in Vrede se stadsaal opgetree.
Dorfling het gesê as Jurie Els in sy verhoor gaan getuig, sal hy getuig hy het dié aand saam met Klay en ds. Els opgetree.
“As dit so is dat daar ’n konsert was, sou daardie voorval (seksdaad) nie kon plaasvind nie. U het mos gaan slaap ná die voorval,” het Dorfling vir Klay gesê.
Klay het daarop gesê: “Ek weet in daardie tydperk het ’n voorval plaasgevind.”
Die verhoor hervat Maandag.