En Bees? ‘Kom ons fokus op rugby’
2010-09-03 22:30
Bloemfontein. – Die moontlikheid van enige verdere omstredenheid in die Springbok-kamp oor die Bees Roux-voorval is gister hier deur die nasionale rugbykaptein in die kiem gesmoor.
“Kom ons fokus eerder op die rugby. Ek weet dit is moeilik vir julle (die media),” het John Smit ewe diplomaties geantwoord op die vraag deur ’n joernalis oor die Roux-voorval.
Peter de Villiers, Bok-breier, het vandeesweek gesê dat die Bokke Roux, ’n stut van die Blou Bulle wat na bewering ’n metropolisieman doodgeslaan het, ondersteun.
De Villiers het gesê hy en sy span het die voorval bespreek en hoewel hulle nie die beweerde daad ondersteun nie, het hulle beslis simpatie met Roux.
Dié uitlating het die druk op De Villiers laat toeneem en sy kop is uit verskeie oorde geëis.
Hoewel dit in dié stadium onwaarskynlik lyk dat hy daaroor afgedank gaan word, sal ’n nederlaag vandag hier teen Australië in die Bokke se Drienasies-toets dinge vir hom baie moeiliker maak.
Die Springbokke kan ná vier loesings in die Drienasies-reeks en een bra onoortuigende oorwinning vandag maar net probeer om ’n bietjie verlore eer te herwin. En hulle sal natuurlik graag dié reeks se houtlepel wil vermy in die jaar voor die volgende Wêreldbeker-toernooi.
Volgens Smit is hy en sy spanmaats gereed om vir oulaas alles in die stryd te werp.
Verskeie Bok-staatmakers sal na dié wedstryd ’n ruskans kry en eers weer in die uitkloprondes van die Curriebeker-reeks vir hul provinsies speel.
Smit het gesê die Mandela-skild, wat jaarliks op die spel is tussen Suid-Afrika en Australië, is genoeg aansporing.
Gelukkig vir die Bokke is daar ’n faktore wat vandag in hul guns tel.
Smit se span is die mees ervare een wat Suid-Afrika tot nog toe verteenwoordig het. Die spelers in die Bok-groep spog ook met altesame 750 toetse tussen hulle teenoor ’n redelik onervare Australiese span wat ook in vanjaar se Drienasies-reeks by tye gesukkel het.