Erge veldbrande verwoes Vrystaat
2010-09-07 22:09
Twee huise in die Fouriesburg-distrik in die Oos-Vrystaat het afgebrand en drie trekkers en bakkies in die slag gebly weens veldbrande.
Weiding is verwoes en wild, perde en vee het doodgebrand in die brande wat sedert Sondag gewoed het.
Brandbestryders het gister nog daarteen geveg. Drie brandbestryders van die regering se Working on Fire (WoF)-span is beseer.
Mnr. Johan Scheepers, ’n boer in die distrik, sê dit was die grootste brand wat hy in 36 jaar beleef het.
“Sondag het ons drie brande gehad wat in rat gespring het. Ons kon dit nie beheer nie, ons het nie personeel gehad nie,” vertel hy.
Teen gistermiddag was die brande grootliks onder beheer.
Mnr. Malcolm Procter, adjunk-direkteur van die departement van landbou, bosbou en visserye in die Vrystaat, sê sedert 1 September het 151 000 ha afgebrand.
Meer as 230 000 ha is vanjaar al in die Vrystaat in brande verwoes.
Volgens Procter het die grootste brande sover voorgekom in die distrikte Fouriesburg, Rosendal, Vredefort, Ventersburg en Mount Pellan (aan die grens van KwaZulu-Natal).
In die Fouriesburg-distrik het sowat 65 000 ha in die slag gebly, by Mount Pellan 35 000 ha, Rosendal 6 000 ha, Vredefort 5 000 ha en in die Willem Pretorius-wildtuin 20 000 ha.