Eskom se wins kan jou sak hupstoot gee

Kaapstad. – Eskom se jongste finansiële resultate het dit vir die regering moontlik gemaak om laer elektrisiteitstariefverhogings te oorweeg.

Eskom het in die ses maande tot 30 September 2011 ’n netto wins van R12,8 miljard verklaar.

Mnr. Malusi Gigaba, minister van openbare ondernemings, het gesê pres. Jacob Zuma was in sy staatsrede Donderdagaand baie duidelik oor sy verwagtings vir elektrisiteitspryse.

“Die president kon toe aankondig dat elektrisiteit(sprysverhogings) moontlik kan daal danksy Eskom se sterk finansiële posisie op die oomblik.”

Hy het gesê die departement gaan ’n voorlegging aan die Na­sionale Energiereguleerder (Nersa) doen ter ondersteuning van ’n laer verhoging in elektrisiteitstariewe, al van 1 April af.

Die tariewe sou op 1 April met 25% gestyg het, maar die verwagting is nou dat die styging heelwat minder sal wees.

Gigaba het gesê hy verwag dat Nersa binne vier weke ’n besluit hieroor sal aankondig.

Die omvang van die verlagings sal afhang van die samewerking wat die regering kry ten opsigte van elektrisiteitsbesparing.

“Die vraag na krag moet daal en Suid-Afrikaners moet ons daarmee help.

“Die ander faktor wat ’n uitwerking kan hê op die prys is natuurlik insetkoste, veral steenkool,” het Gigaba gesê.