‘Geen geld vir hysbakke’

Talle inwoners van die Polwin Hof-woonstelblok in die Pretoriase middestad is gestrand weens hysbakke wat maande en selfs jare lank al buite werking is.

Die situasie het meegebring dat selfs blinde inwoners die trappe moet aandurf.

Mnr. Rudie Nieuwenhuis (51) en sy lewensmaat, mev. Charmaine Roberts (45), sê hulle sukkel sedert November verlede jaar om onder meer hul kruideniersware by die 11de vloer uit te kry.

“Dis al meer as drie maande wat ek nêrens was nie. Ek is in dié woonstel vasgekeer,” sê Niewenhuis, wat sedert 1990 daar bly.

Niewenhuis is ’n diabeet, ly aan asmatiese brongitis, het hoë bloeddruk en benodig dringend ’n hartomleiding.

Hy het weens sy gesondheid verlede jaar afgetree.

Niewenhuis sê die hysbak staan meer as hy wat hy “hardloop”.

Die ander hysbak werk glo al jare lank nie.

Roberts ly aan soortgelyke probleme en het trombose in haar bene.

Sy moet telkemale rus voordat sy die trappe verder kan uitklim.

Tog moet sy dit daagliks doen om kruideniersware te koop.

Volgens Roberts het ’n inwoner in Desember ’n miskraam gehad omdat albei hysbakke buite werking was.

Mev. Drieka Gordon en haar man, Connie, ( albei 62) sukkel net só.

Mev. Gordon is blind gebore en haar man is weens emfiseem aan ’n suurstofmasjien gekoppel.

Hy kan amper nie meer loop nie.

Hulle bly sedert 1987 op die vyfde vloer. Met haar kierie in die hand durf sy byna daagliks die trappe aan om die nodigste aan te koop.

“Ek is elke keer baie trots as ek dit gemaak het,” sê sy.

Me. Neo Nare (35) is van ’n elektriese rolstoel afhanklik.

Sy het in Desember uitgetrek omdat sy nie langer ’n las vir ander wou wees wat haar en die rolstoel daagliks met die trappe moes opdra nie.

Sy het vyf jaar lank op die agtste vloer gebly.

Die woonstelblok het 16 vloere.

Volgens dr. Nicol van Straaten, voorsitter van die trustees wat die woonstel bestuur, is oorbevolking van die woonstelle ’n groot probleem.

“Daar is tans 600 mense wat hier bly, waar daar net 380 mag bly.

“Weens die oorbevolking het waterverbruik die hoogte ingeskiet. Om dié uitgawe onder beheer te bring, word daar voorgestel dat watermeters geïnstalleer word en agterstallige skuld op datum gebring word.”

Dít moet gebeur voordat daar “enigsins na ’n nuwe hysbak gekyk sal word”, het Van Straaten gesê.

Volgens hom is kwotasies vir die herstel van die hysbakke gekry en sal een hysbak R1,5 miljoen kos.

“Die finansies wys as die waterprobleem opgelos kan word ons ’n bykomende R35 000 per maand sal hê om te bestee.”

Die totale skuld is glo meer as R1 miljoen, wat nie die agterstallige heffings van R460 000 insluit nie.