Gejika-jika op die water

Pemba. – Sedert Suid-Afrikaanse soldate ’n jaar gelede die Mosambiekse kanaal begin patrolleer het, was daar nog nie een voorval van see­rowery in dié water nie.

Dit is te danke aan vier fregatte met 180 soldate aan boord.

Die soldate op die fregatte bring 28 dae op die see deur, waarna hulle na Pemba terugkeer om hul voorraad aan te vul, het olt. Tumelo Mmusi gesê.

Pemba is die noordelikste hawestad in Mosambiek.

Volgens Mmusi wissel die vier fregatte mekaar elke drie maande af.

Hoewel hulle nog nie ’n seerower van ’n dag oud gesien het nie, is daar baie om op die skip te doen, het olt. Pearl-Jane Mothapo (25) gesê.

Dié vroutjie van Turfloop, buite Polokwane, is sowat ’n maand gelede op die fregat Isandlwana, wat die Mosambiekse kanaal nou patrolleer, ontplooi.

Sy is lid van die span wat die spyseniering doen en is ook in opleiding om ’n offisier op dek te word vir wanneer die kaptein nie op die fregat is nie.

“Daar is so baie om te doen; daar is nie tyd om huis toe te verlang nie,” het Mothapo gesê.

“Ons doen patrollies en leer die toerusting en kompartemente op die boot ken.

“Dan reël ons ook sosiale aktiwiteite om te keer dat die mense depressief raak en huis toe verlang.”

Vrydae is dit fliekaand in die helikopterloods; Saterdae word daar gebraai en gejika-jika; en op afdae kry van die soldate kans om Pemba te verken.

Bevare seeman Ivan Basson (21) het gesê hy verlang baie na sy huis in Rustenburg, maar Facebook en ’n selfoon help ’n bietjie.

Volgens Basson is dit belangrik om jouself besig te hou.

Die fregat het ’n gimnasium en die soldate kan op die vliegdek draf. Wanneer hulle nie werk of oefen nie, swem hulle in die see, speel op hul rekenaar en kuier in die offisiersbak, die fregat se kuierplek.

Daar is ’n kroeg, maar geen alkohol word toegelaat wanneer die soldate op see is nie.

Hulle mag net drink as hulle in die hawe is.

Basson is ’n sjef wat moet seker maak die offisiere is gevoed en die fregat skoon. Hy is ook lid van die duikspan wat instandhoudingswerk doen.

“Wat dié projek so suksesvol maak is dat ons nie gevra is om hierna toe te kom nie, maar dat ons aangebied het om die werk te kom doen,” het Basson verklaar.

“Ons wil hier wees.”