‘Geluk, jy erf R50 m.!’

George. – ’n Toesighouer op ’n aartappelplaas het ’n blink verjaardagpartytjie gehou nadat sy vir ’n bedrogspul geval het wat haar ingelig het sy het R50 miljoen geërf.

Me. Rachel van Rooyen, ’n werknemer op die Van Greunen-boerdery op Geelhoutboom, is per SMS van haar meevallertjie ingelig.

“Ek het elke Sondag kontak met die mense wat die geld belowe. Hulle het al op die plaas kom kuier,” het sy gister gesê. Sy wou egter nie hul identiteit of kontaknommers bekend maak nie.

Ondanks aanduidings dat dit ’n bedrogspul kan wees, het sy Saterdag in die burgersentrum ’n groot partytjie vir haar 40ste verjaardag gehou.

Volgens die eienaar van ’n plaaslike boetiek wat graag anoniem wil bly, het van Van Rooyen se familie van Johannesburg en Kaapstad die partytjie bygewoon.

Twee weke nadat sy die verwagte geld sou kry, skuld Van Rooyen nou glo etlike duisende rande aan plaaslike skoonheidsalonne, ’n spysenier en ’n winkel wat trou- en aanddrag verhuur.

’n Motorhandelaar op die dorp het bevestig dat Van Rooyen twee voertuie bestel het, maar ná medianavrae die bestelling gekanselleer het. Sy sou glo kontant betaal.

Van Rooyen het vir haar ’n tabberd laat ontwerp en 11 aandrokke vir familielede gehuur. Die tabberd is wel betaal, maar sy skuld nog ’n stewige bedrag op die huur van die aandrokke, volgens die winkeleienaar.

’n Niggie van Van Rooyen het blykbaar ’n lening van R20 000 aangegaan om ’n deel van die koste te dek.