‘Gemengde ekonomie is beleid’
2012-02-10 22:20
- Artikelopsies
- Deel
- Kry Beeld op
Kaapstad. – “Ons beleid is duidelik en dis nie nasionalisering nie,” het pres. Jacob Zuma gister oor die nasionalisering van myne gesê. “Ek verstaan nie hoekom mense daarmee worstel nie.”
Hy het by ’n ontbytgeselligheid van The New Age gesê die ANC-jeugliga het die kwessie geopper. “Wanneer kwessies geopper word, word dit vir bespreking aan ANC-prosesse onderwerp. Alle kwessies wat ’n struktuur of ’n ANC-lid opper, word aan dié prosesse onderwerp, wat dan in beleid kan ontwikkel.”
Mnr. Zwelinzima Vavi, sekretaris-generaal van Cosatu, het vroeër vandeesweek gemaan leiers moet hulle nie voortydig uitspreek oor beleidsvoorstelle wat nog nie behoorlik op ’n beleidskongres bespreek is nie.
Zuma het gister gesê net die ANC se nasionale beleidskongres (in Junie) kan aanbevelings daaroor na die nasionale kongres (in Desember) stuur.
“En net dan kan daar oor ’n kwessie besluit word en gesê word dit is beleid. Een mens kan nie ’n siening opper en dan is dit beleid nie. Die ANC-regering sê nasionalisering is nie sy beleid nie – ons beleid is dié van ’n gemengde ekonomie.”
In politieke kringe word gesê vir sakelui verskuif die kwessie nou van die woord “nasionalisering” na ander maniere waarop die regering sy mag oor dié sektor wil laat geld – soos met die voorgestelde super-belasting.
In ’n onafhanklike studie oor die haalbaarheid van die nasionalisering van myne wat die ANC self aangevra het, is dit afgeraai.
Na berig word, word daar in die verslag eerder ’n 50%-belasting op mynbouwinste voorgestel om armes beter by die land se minerale te laat baat vind.
Mnr. Kenny Bafo, politieke ontleder aan die Universiteit van Wes-Kaapland, het gesê hy twyfel of Zuma se woorde noodwendig die einde van die kwessie is.
“Dit kan hoogstens gesien word as Zuma wat sy magsposisie wys noudat (mnr. Julius) Malema nie meer in die prentjie is nie.”
Zuma het oor werkskepping gesê die ANC-regering het onder omstandighede nie sleg gevaar nie. “Dat ons ondanks moeilike globale ekonomiese toestande werk geskep het, spreek boekdele.”
Zuma het gesê die beplande infrastruktuurontwikkeling sal ook help werk skep.
Die werkloosheidsyfer draai steeds by nagenoeg 23%.