Generaals vat strydbyl

Kaapstad. – Twee voormalige polisiegeneraals oorweeg regstappe weens genl. Bheki Cele, nasionale polisiehoof, se “inkriminerende uitlatings” verlede week in die parlement.

Lt.genl. Hamilton Hlela, voormalige hoof van voorsieningsbestuur, het gister gesê hy het reeds met sy prokureur gepraat.

Ook genl.maj. Stephanus Terblanche, ’n voormalige bestuurder in dieselfde afdeling, het bevestig hy gaan stappe doen sodra die spesiale ondersoekeenheid (SOE) se ondersoek na die polisie se verkrygingsprosedures afgehandel is.

Albei was Vrydag in die spervuur toe Cele en sy topbestuur voor die portefeuljekomitee oor polisie verskyn het.

’n Slangput van verdagte huurkontrakte, bouprojekte en tenders vir goedere en dienste het ter sprake gekom.

Hlela en Terblanche, wat die polisiediens in Augustus verlaat het, is in hul afwesigheid as die sondebokke uitgesonder vir beweerde wanpraktyke wat onder hul toesig plaasgevind het.

“Ons is vir ’n spul misdadigers uitgemaak, maar ek sal enige tyd parlement toe gaan. Ons kan rekenskap gee van elke sent wat bestee is,” het Terblanche gister gesê.

Volgens Terblanche het Cele op 14 Julie besluit hy word herontplooi en dat hy sy pos “onmiddellik” moet verlaat.

“Cele het (strydig met polisievoorskrifte) geen redes gegee nie. Ek het geweier.”

Terblanche is ontslaan en het ’n goue handdruk van twee jaar se salaris ontvang.

Dit is vir hom vreemd dat die polisie hom nie eerder geskors of aangekla het weens die beweerde wanpraktyke wat in die parlement geopper is nie.

“Ek is ná 40 jaar weg met ’n skoon gedragstaat wat deesdae seldsaam in die polisie is. Ek is nog altyd as ’n toppresteerder gereken.”

Hy meen die SOE se ondersoek sal lig werp op die omstrede peperduur huurkontrakte vir die polisie se hoofkantore in Pretoria en Durban wat onlangs in opdrag van die minister van openbare werke beëindig is.

Terblanche was veronderstel om dokumente vir die behoeftebepaling en koste verbonde aan die nuwe geboue af te teken omdat dit betrekking het op ’n begroting wat onder sy toesig was.

“Maar ek het geweier.”

Ook Hlela het gister die aantygings teen hom ontken.

“Ek is uiteraard ontsteld. Ek het nie bedank nie, maar vroeg afgetree omdat ek gevoel het ek móét gaan.”

Hy wou nie antwoord op die vraag of hy uit sy pos gedwing is nie.

Volgens Hlela het die departement van openbare werke die kontrak om die polisie se hoofkantoor in Wacht-huis in Pretoria te huisves met tien jaar verleng.

“Dit was nie ek nie.”

Voorts is die bestelling vir nege waterkanonne van R47 miljoen “nooit goedgekeur nie” en hy “weet niks” van ’n kontrak van R12 miljoen om Cele en mnr. Nathi Mthethwa, minister van polisie, se kantore in Wachthuis op te knap nie.