Gordhan moet sê oor tolgeld

Kaapstad. – Mnr. Pravin Gordhan, minister van finansies, moet binne die volgende drie weke besluit of tolgeld wel op die nuwe Gautengse snelweë gehef gaan word.

Mnr. S’bu Ndebele, minister van vervoer, het gister aan Beeld gesê dié verantwoordelikheid is by die onlangse kabinet-lekgotla aan Gordhan gedelegeer.

Die Suid-Afrikaanse Nasionale Padagentskap (Sanral), wat die paaie laat bou het en die tolgeld wil hef, is ’n entiteit van die departement van vervoer.

Sanral sou reeds vandeesmaand begin het om tolgeld te hef, maar dit is onbepaald uitgestel nadat verskeie organisasies, waar­onder die Automobiel-Assosiasie (AA), die vakverbond Cosatu en opposisiepartye beswaar aangeteken het en die publiek selfs ontmoedig het om aan die proses deel te neem.

Veral Cosatu het sterk standpunt ingeneem en beplan steeds ’n landwye staking in Maart om die regering sover te kry om die tolstelsel te laat vaar.

Ndebele het gesê Gordhan het al die inligting oor die saak tot sy beskikking.

“Die petisies, die verklarings, al die inligting is by die minister van finansies. Hy sal nou al die faktore in ag moet neem, soos die finansiële implikasies en die tegniese aspekte.

“Daarna sal hy ’n besluit oor die saak neem. Ons verwag hy sal net ná vanjaar se begrotingsrede ’n aankondiging oor die saak doen.”

Sanral het die tolgeld nodig om die skuld te delg wat aangegaan is om die nuwe paaie te bou.

Die agentskap het ’n skuldlas van bykans R28 miljard.

Beeld verstaan Sanral is kontraktueel verplig om die tolstelsel in te stel omdat die projek gebou is op ’n plan waarvolgens tolgeld betaal sal word.

Dié tol­proses moet voortgaan tensy Sanral ’n alternatiewe opdrag van regeringskant ontvang.

Die Gautengse regering het reeds aan die einde van die 1990’s besluit om die paaie te bou. In 2008 het die nasionale regering ingestem dat tolgeld gehef sal word om vir die projek te help betaal.

Die tesourie se woordvoerders kon nie gister vir kommentaar bereik word nie.