Groepe veg vir Pretoria

Talle belangegroepe sal die regering se planne teenstaan om Suid-Afrika se hoofstad na Tshwane te hernoem.

AfriForum, die VF+ en die Nasionale Belastingbetalersunie (NBU) het gister gesê hulle is gekant teen die naamsverandering en sal ’n verenigde front vorm om te keer dat die planne deurgevoer word.

Me. Nomvula Mokonyane, Gautengse premier, en mnr. Paul Mashatile, minister van kuns en kultuur, het eergister gesê die kwessie oor die naam van Suid-Afrika se hoofstad moet voor die einde van 2012 uitgeklaar word.

Die saak moet dringend gefinaliseer word, het Mokonyane gister in Pretoria gesê. “Ons moenie druk uitoefen nie, want dit is ’n sensitiewe saak en daar is emosies aan albei kante, maar ons kan nie ons erfenis vier te midde van onsekerhede nie. Die land moet vorentoe beweeg en versoening gaan gepaard met naamsverandering.”

Dr. Pieter Mulder, VF+-leier, het gesê hy dink die naamsverandering is ’n politieke skuif om punte te wen in die aanloop tot die ANC se leiersverkiesing in Desember vanjaar.

“’n Naamsverandering van Suid-Afrika se hoofstad is nie ’n saak wat net so afgehandel kan word nie. Ek is kwaad oor die goedkoop manier waarop hulle dink hulle die verandering so vinnig kan laat deurglip. Versoening en samewerking word op die agtergrond geplaas ter wille van ANC-belang. Ons sal op alle terreine daarteen veg, dit is onnodig.”

Mnr. Jaap Kelder, voorsitter van die NBU, het gesê die koste van die naamsverandering kwel hom.

“Dit is absolute nonsens. Die metro is Tshwane, maar Pretoria was en is en bly die hoofstad. Daar is geen rede waarom hulle daardie naam moet verander behalwe dat die ANC elke Afrikaanse naam wil verander nie.”

Mashatile het gesê hy beoog vergaderings tussen die stadsraad van Pretoria, AfriForum en ander belangegroepe oor die kwessie.

“Ons moet ons verskille uitstryk en duidelikheid kry oor wat van Pretoria oorbly. Ons moet besluit wat ons die hoofstad van Suid-Afrika gaan noem.”

’n Formele raadplegingsproses sal ook plaasvind voordat ’n finale besluit geneem word.

Mnr. Kallie Kriel, uitvoerende hoof van AfriForum, het gesê hulle het al informeel met die stadsraad gepraat oor die kwessie en sal graag deelneem aan ’n formele konsultasieproses en samesprekings met die minister.

Mnr. Salin Joseph, president van die Tshwane-sakekamer, het gesê hulle wil nie tans standpunt inneem oor die naamsverandering nie. “Geen individu het die reg om daaroor te besluit nie. Die stad se inwoners moet sê of die naam Tshwane of Pretoria sal wees.”