‘Grond sal bepaal of daar vergifnis sal wees’

Kaapstad. – Die vergewensgesindheid van swart Suid-Afrikaners moet nie as vanselfsprekend aanvaar word nie, het mnr. Gugile Nkwinti, minister van landelike ontwikkeling en grondhervorming, gister gewaarsku.

Hy het tydens sy begrotingstoespraak in die Nasionale Raad van Provinsies (NRP) gesê ware versoening kan nie gebeur sonder dat die “grondvraagstuk” ingevolge die ANC se Polokwane-kongres opgelos word nie.

Hoewel die Waarheid-en-versoeningskommissie getoon het swart Suid-Afrikaners kan vergewe, is ’n gemeenskaplike poging nodig om die “woede, bitterheid en pyn” van dié wat wreed gely het te versag.

Die minister het egter steeds geen praktiese planne ter tafel gelê om dit te verwesenlik nie. Die groenskrif oor die regering se nuwe benadering tot grondhervorming is ná maande steeds nie klaar nie.

Hy het egter herhaal die regering is vasbeslote om ’n nuwe vorm van verblyfreg op drie vlakke in werking te stel.

Daarvolgens sal private eiendomsreg “beperk” word.

Nkwinti het gister gesê boere sal beperk word wat die hoeveelheid grond wat hulle mag besit betref. Hy voorsien nie “dat dit probleme sal afgee nie”.

“In die debat wat oor dié kwessie wat sal volg... indien daar onder meer bepaal word 1 000 ha landbougrond is ’n voldoende hoeveelheid grond (vir een persoon), en Nkwinti besit 2 000 ha, sal Nkwinti 1 000 ha moet afstaan.”

Volgens hom sal die grond wat afgestaan word – dis onduidelik hoe dit sal gebeur – nie vir produksie verlore hoef te gaan nie en sal die regering seker maak die grond word behoorlik benut.

“Die doel is nie om produksie aan te tas nie, die doel is eerder om skewe patrone van grondbesit te verander.”

’n Nuwe grondbestuurkommissie wat op die been gebring sal word, gaan volgens Nkwinti daarvoor verantwoordelik wees “om die integriteit van grond as nasionale bate te beskerm”.

Die minister het gesê dit sal die regering eerste opsie gee op landbougrond wat te koop is.

Me. Annette Steyn, DA-LP, het gesê die regering sal die groenskrif nie nou al bekend stel nie.

“Dis duidelik hulle wag tot ná WB 2010... hulle wil nie met die wêreld se oë op ons drama oor grond hê nie.”