Grutonele beskryf waar ma vermoor is
2010-05-27 14:11
Amanda Roestoff
’N 17-jarige meisie het “gorrelgeluide gemaak en spoeg het uit haar mond geloop” toe die polisie haar aangetref het in die gesin se huis in Noordheuwel, Krugersdorp, waar haar ma vermoor is.
Ao. Lourens Jacobs van die Wes-Randse honde-eenheid het gister die grusame tonele in die huis in die verhoor van mnr. Mphaphantsi Stanley Mabulana (28) voor landdros Vivian Hawkins beskryf.
Hy is die tweede beskuldigde in die saak.
Mabulana staan tereg op aanklag van moord op mev. Marinda O’Dell (48), huisbraak met die opset om te roof en poging tot moord. Hy ontken skuld op al drie aanklagte.
O’Dell, ’n arbeidsterapeut, se keel is op 29 Julie afgesny. Haar dogter, Alicia (toe 17), is voor die moord op haar ma in die huis oorval, met ’n breekyster op die keel geslaan en gewurg totdat sy flou geword het.
Jacobs het getuig hoe hy mev. O’Dell se lyk by die laaste trap op die boonste verdieping van die huis in Magaliesbergstraat gevind het.
“Haar gesig was vol bloed. Daar was ’n groot gat in haar linkerskouer en sy het snymerke van links na regs oor haar keel gehad.”
O’Dell se dogter is in haar kamer langsaan aangetref waar sy op haar rug op die vloer gelê het. “Sers. Coetzee, wat mediese opleiding gehad het, het na die dame begin omsien,” het Jacobs getuig.
Hy het die toneel in die hoofslaapkamer met bloedspatsels op die mure beskryf en vertel hoe hulle ’n breekyster agter die bed versteek gevind het.
’n Luik in die dak van die hoofslaapkamer het die polisie op die spoor van mnr. Phetoke Cedrick Lebea (29) gesit, wat toe in die dak in hegtenis geneem is. Daar is nog nie getuig hoe Mabulana gearresteer is nie.
Lebea dien tans lewenslange tronkstraf in die Leeuwkop-gevangenis uit weens sy rol in die aanval.
Hy is op 20 Oktober ook tot 15 jaar tronkstraf gevonnis weens huisbraak met die opset om te roof en roof met verswarende omstandighede. Hy sal eers vir parool in aanmerking kan kom wanneer hy 53 is.
Hy sal in Oktober, wanneer die verhoor hervat word, vir die staat getuig.