‘Handel wet vir DNS-databasis in SA nóú af’

Dit is hoog tyd dat die wetgewing vir die regulering van ’n reuse-databasis van DNS-profiele van alle misdadigers in Suid-Afrika afgehandel word.

Só het me. Vanessa Lynch gesê. Sy is ’n voormalige prokureur wat haar sedert haar pa in 2004 vermoor is, beywer vir beter benutting van DNS om misdaad te bestry.

Lynch, wat betrokke is by DNA Project SA, het op die derde jaarlikse Afrika-konferensie oor forensiese DNS gesê kenners werk aan voorgestelde wetgewing vir so ’n stelsel nadat vorige wetsvoorstelle nie deurgevoer is nie.

Kapt. Prince Msomi, ’n senior forensiese ontleder van die polisie se DNS-databasis, het gesê daar is tans geen wetgewing wat die proses reguleer nie.

Daar is al voorgestel dat almal wat by sogenaamde kontakmisdaad, soos verkragting en moord, betrokke is, verplig word om DNS-monsters te verskaf en dat die DNS-profiele van dié wat skuldig bevind word minstens 30 jaar in ’n databasis bly.

Volgens Lynch is vorige voorgestelde wetgewing vir polisie-gebruik van DNS nie deurgevoer nie nadat menseregte-aktiviste beswaar daarteen gemaak het op grond van mense se reg op privaatheid en die portefeuljekomitee wat die voorstelle gehanteer het ná die 2009-verkiesing ontbind is.

Kenners werk nou aan ’n tweede dokument waarop die publiek kommentaar sal kan lewer voordat die parlement dit goedkeur.

’n Regeringtaakspan was in Junie in Brittanje en Kanada om te kyk hoe sulke DNS-databasisse gereguleer word.

Volgens Lynch is daar kommer oor die koste van so ’n projek. Die plan is dus om aanvanklik daarop te fokus om ernstige misdaad te bekamp.

Daar is onder meer voorgestel dat DNS-profiele eers verkry word van sekere kategorieë misdadigers, soos verkragters, moordenaars en mense wat vonnisse van vyf jaar of meer tronkstraf gekry het.

Die stelsel kan dan later uitgebrei word om almal in te sluit wat skuldig bevind is aan misdade waarvoor hulle tot minstens twee jaar tronkstraf gevonnis is.