Hartprobleme hou akteur uit ‘Grotoupa’
2010-09-07 22:08
- Artikelopsies
- Deel
- Kry Beeld op
Die Grotoupa moet vir eers nog in die grot bly.
Cobus Visser (61), wat die rol van die Grotoupa in die oorspronklike teaterproduksie Groet die Grotoupa sou vertolk, moes hom weens gesondheidsredes aan die produksie onttrek.
Groet die Grotoupa sou vanaand in die Mardi Gras-teater by Carnival City in Brakpan geopen het, maar is nou onbepaald uitgestel totdat ’n nuwe akteur gevind kan word.
Die teks is deur Lizz Meiring geskryf en sy is ook die regisseur.
Meiring en Frans Swart van Lefra-produksies, die vervaardiger, het gister aan Beeld gesê dat Visser hom op doktersadvies weens hartprobleme aan die produksie moes onttrek.
Volgens Meiring kon sy agterkom dat ’n solovertoning se fisieke eise sy tol op Visser eis.
“Hy is regtig nie gesond nie en ons kon nie anders as om die produksie uit te stel nie,” het Meiring gesê.
Volgens haar stel ’n verhoogproduksie veel hoër eise as die TV-werk waarmee Visser hom in sy rol as Gerhardt in die sepie Villa Rosa besig hou.
Meiring het die rol van die Grot-oupa spesifiek met Visser in gedagte geskryf.
Visser het in ’n mediaverklaring laat weet dat hy jammer is om almal in die steek te laat, maar nie kan bekostig om nié na sy spesialis te luister nie.
Mense wat al kaartjies vir die speelvak gekoop het, sal dit by Computicket kan omruil sodra die produksie se nuwe datums bekend is.