Hoeweloseerders kom op 2 se lyke af

Hulle het sy geliefde broer (65) “soos ’n hond” met ’n draad om sy nek aan ’n sleepwa vasgemaak.

Dit is hier, op ’n kleinhoewe by Boschkop, oos van Pretoria, waar die lyke van mnr. Martin “Tienie” Jacobs en sy tuinier, toegepak onder bokse en kussings, gisteroggend sowat 12 tot 18 uur ná hul dood gevind is.

Jacobs en sy tuinier, wie se identiteit en ouderdom nog nie bepaal kon word nie, is albei vermoedelik verwurg.

“Ek kan nie glo dat hulle ’n ou man soos ’n hond moet vasmaak nie,” het mnr. William Thomas Wiggill (60) gister gesê nadat hy sy broer se lyk gesien het.

“Dit is lelik. Dit is verskriklik lelik.

“Hulle gaan uit om ons uit te moor.”

Wiggill, sy vrou, Winnie (58), en dogter, me. Letitia Coetzer (36), het gisteroggend van Cullinan deurgejaag toe hulle die tyding gekry het.

Insp. Marinda Stoltz, polisiewoordvoerder, het gesê mense wat op dié kleinhoewe, waar Jacobs opsigter was, geloseer het kon hom sedert eergistermiddag omstreeks 16:30 nie in die hande kry nie.

Gisteroggend het sy motor, nes die vorige aand, steeds buite die erf gestaan in plaas van binne die erf.

Die loseerders het begin om hom te soek, onder meer by sy geliefde voëlhok.

Hulle het op sy lyk en dié van die tuinier, wat sowat ’n jaar lank al vir Jacobs werk, afgekom in die motorafdak langs die voëlhok.

Jacobs het agter ’n Chevrolet-motor gelê. Sy hande en voete was vasgebind en sy nek met ’n stuk draad aan ’n sleepwa vasgebind. Sy horlosie was nog aan sy arm en sy skoene het ’n entjie van sy lyk gestaan.

Die tuinier se lyk, wat langs Jacobs gelê het, was met bokse en kussings toegepak. Sy hande en voete was ook met draad vasgebind.

Mev. Wiggill het gesê haar swaer was maer en tingerig en sou nie kon terugbaklei as hy deur misdadigers oorval is nie.

Volgens haar kon Jacobs net sy een arm ten volle gebruik omdat die ander arm vroeër skeef aangegroei het nadat dit gebreek is.

“As hulle honger was, sou hy vir hulle kos gegee het. Dis die soort mens wat hy was,” het mev. Wiggill gesê.

“As hulle niks teen hom gehad het nie, sou hulle hom mos nie so van kant gemaak het nie?

“Waarom op dié manier?

“Hy was ’n lieflike ou mannetjie. Ek gaan hom mis,” het mev. Wiggill gesê.

Dit is nog nie duidelik of enigiets geroof is nie.

- Beeld