Nadat ’n rower mnr. Hein de Jager
(28) in ’n winkel in Pretoria geskiet het, het ’n klant langs hom gaan sit waar
hy op die vloer gelê het en hardop vir hom gebid.
Dié getuienis is gister in die hooggeregshof in Pretoria in vyf
mans se verhoor gelewer.
Mnre. Enoch Masipa, Bonginkosi Modawe, Johannes Sebyeng, Lolo Langa
en Godfrey Mogashoa het skuld ontken op verskeie aanklagte.
Hulle het die Dreyers Moot-boumateriaalwinkel in Akasia na bewering
op 13 Maart 2008 beroof en De Jager doodgeskiet.
De Jager was getroud, die pa van ’n
babaseun en ’n vennoot in die onderneming.
Die staat beweer ’n beskuldigde is dieselfde dag gearresteer toe hy
in besit was van die motor wat in die rooftog gebruik is, asook van geroofde
goed. Hy het die ander beskuldigdes uitgewys.
Mev. Hester Potgieter, kassier by Dreyers, het getuig terwyl sy ’n
klant, mev. Riana Badenhorst, die middag van 13 Maart gehelp het, het sy iemand
na De Jager sien stap.
’n Stem het gesê “ons wil jul geld hê” en ’n skoot het geklap. ’n
Man met ’n rokende vuurwapen het by De Jager gestaan.
Nog ’n gewapende man het haar beveel om die geldlaai oop te maak.
Hy het geld daaruit gehaal en in haar handsak gesit.
Die man wat geskiet het, “het presies geweet waar die kluis is” en
haar “die regte sleutel gegee” om dit oop te sluit.
Die drie rowers het haar in ’n hoek gestamp, geld uit die kluis
gehaal, dit in haar handsak gesit en gevlug.
De Jager het op sy sy in sy kantoor gelê. Toe die polisie en
paramedici opdaag, was hy dood.
Potgieter het haar handsak met haar besittings daarin later by die
polisie teruggekry.
Sy sal die rowers nie kan herken nie, het Potgieter getuig.
Badenhorst het getuig sy het tydens die rooftog geskuil en die
polisie gebel.
Nadat die rowers weg is, het sy by De Jager gaan sit en hardop
gebid.
Musse was laag oor die rowers se koppe getrek, het sy getuig.