Hondeslagter gaan vir evaluering
2012-01-23 22:32
Die man wat glo twee honde doodgemaak en afgeslag het, moet vir psigiatriese behandeling gaan.
Mnr. Christiaan Lamprecht (22) sal vir nog ’n maand in hegtenis bly sodat hy in die Weskoppies- psigiatriese hospitaal geëvalueer kan word.
Lamprecht het gister vlugtig in die distrikshof in Pretoria-Noord op aanklagte van wreedheid teenoor diere en opsetlike saakbeskadiging verskyn.
Net voor sy verskyning is Lamprecht na ’n distriksgeneesheer geneem.
Luidens die distriksgeneesheer se verslag verstaan Lamprecht die aanklagte teen hom en kon hy ’n beskrywing van die beweerde misdaad gee.
Wat dié beskrywing is, is nie in die hof genoem nie.
Die verslag lui verder dat Lamprecht ’n verhoor sal kan volg.
“Omrede die aanklag herhaal is, beveel ek aan dat hy (Lamprecht) vir psigiatriese behandeling gaan,” lui die verslag.
Lamprecht is verlede naweek gearresteer nadat karkasse van twee honde in sy kas, onder sy bed, in sy vrieskas en in ’n buite-vullisblik van sy tuinwoonstel in Wesstraat in Pretoria-Noord gevind is.
’n Klag van wreedheid teenoor diere is sowat twee jaar gelede teen Lamprecht teruggetrek nadat hy ’n afwentelingsprogram voltooi het.
Dít het gebeur nadat hy sy bure se worshond verwurg het.
Deel van Lamprecht se afwentelingsprogram was om 56 uur se gemeenskapsdiens in die Nasionale Dieretuin in Pretoria te verrig. Wanneer iemand ’n geskikte kandidaat vir ’n afwentelingsprogram is, aanvaar hy aanspreeklikheid vir sy misdryf en moet hy verskeie kursusse bywoon. As die program suksesvol voltooi word, word die strafregtelike aanklag teruggetrek.