Hondjie in sy hok met klapper gedood
2010-01-09 00:52
- Artikelopsies
- Deel
- Kry Beeld op
’n Swart miniatuur-dobermann is blykbaar met klappers in sy hok opgeblaas.
Werkers van die Heidelbergse Dierebeskermingsvereniging (DBV) aan die Oos-Rand het eergister op die oorblyfsels van die hondjie binne-in ’n geel hok met ’n rooi dak in ’n oop stuk veld afgekom.
“Sy gesiggie was erg gebrand. Ek was in ’n toestand hieroor. Die DBV is bereid om ’n beloning van R1 000 te betaal aan die persoon wat die skuldige kan uitwys,” het ’n steeds geskokte me. Ans Botha, bestuurder van die Heidelberg-DBV, gister gesê.
Volgens haar was die hok in ’n veld agter die DBV waar mense gewoonlik met hul kwadfietse ry.
“ ’n Kind wat met sy kwadfiets daar gery en op die aaklige vonds afgekom het, was so wit soos ’n laken toe hy ons kom vertel het.
“Ons het ’n klag van dieremishandeling by die polisie ingedien. Sodra ’n verdagte geïdentifiseer word, sál die persoon vervolg word,” het Botha gesê.
Sy het haar steun gegee aan ’n Facebook-groep teen klappers wat vandeesweek gestig is.
Die ledetal van die BAN Fireworks in South Africa!-groep, wat deur ’n Pretoriase prokureur gestig is, het nog elke dag met meer as 1 000 gegroei.
Mnr. Coenie Kukkuk, die prokureur, het gisteroggend laat weet die ledetal het toe op 4 435 gestaan en bly styg.
Die Facebook-groep beywer hom vir die verbied van of baie strenger beheer oor die gebruik van plofstof en vuurwerk in Suid-Afrika.
“Ons sal behoorlike regsnavorsing doen om die beste maniere te vind om die grondwetlike regte van diere-eienaars en die reg tot ’n veilige omgewing af te dwing,” het Kukkuk gesê.
- Bel die Heidelberg-DBV by 016 341 3998 met inligting.
- Beeld