Hoogdrama in Pta nadat rowers toeslaan
2009-10-22 12:32
In wat beskryf is as 'n mini-oorlog is 'n vermeende rower en 'n veiligheidswag gewond nadat 'n groep booswigte op ondernemings in Menlynsentrum in Pretoria toegeslaan het.
'n Polisieman wat van diens af was het gesien hoe tot 10 rowers Donderdagoggend op 'n juwelierswinkel en 'n tak van Nedbank toeslaan en het hulle in sy private motor agtervolg.
'n Oor-en-weer-skietery het ontstaan en 'n veiligheidswag is gewond. Die polisieman het een van die vermeende booswigte raakgeskiet.
Dramatiese tonele het daarna afgespeel toe polisieversterkings opgedaag en gehelp het om die booswigte te jag.
Volgens polisiewoordvoerders is altesame agt verdagtes op verskeie plekke aangekeer. Elke nou en dan is geweerskote op tonele gehoor en 'n polisiehelikopter het in die lug gesirkel.
Lees die volledige berig Vrydag in Beeld. - Hilda Fourie