Hulle red, hulle vang en hulle lei
2012-01-29 21:31
- Artikelopsies
- Deel
- Kry Beeld op
Vyf uitblinker-polisielede en ’n reservis van Gauteng is Vrydag ter viering van Nasionale Polisiedag deur die vakbond Solidariteit vereer.
Solidariteit ken jaarliks Sterre in die Gemeenskap-toekennings toe aan mense wat volgens hulle ’n besondere bydrae tot die gemeenskap gelewer het.
Een van die vereerdes is ao. Peet du Toit, ’n lid van die Krugersdorpse eenheid teen gesinsgeweld, kinderbeskerming en seksuele misdrywe (GKS).
Du Toit het ’n deurslaggewende rol gespeel in die inhegtenisneming van mnr. Jaco Steyn, wat in die Krugersdorp-streekhof teregstaan op sowat 33 misdrywe – onder meer die moord op Louise de Waal (16) in Oktober.
Ao. Johan Fourie van die Oos-Randse berede-eenheid het verlede jaar ’n dag in die hospitaal deurgebring nadat hy ’n eenjarige seuntjie van ’n swerm bye gered het.
Die bye het Fourie ook getakel en sy ooglede so gesteek dat hy nie kon sien nie.
Ao. Jan Pretorius, ’n polisiebeampte van Balfour in Mpumalanga, het in Augustus 2010 ’n sesjarige seuntjie uit ’n dam langs die Siyathemba-woonbuurt buite Balfour gered.
Enkele weke later is hy ernstig gewond nadat hy van diens af ’n lid van die publiek te hulp gesnel en ’n bende inbrekers aangevat het.
Hy is vyf keer raak geskiet, maar kon daarin slaag om een van die rowers dood te skiet.
Ao. Jaco Botha van die Hercules-polisiekantoor in Pretoria en sy kollega die reservistekonstabel Gerhard Weyers het in Augustus 2010 roofverdagtes voor ’n meubelwinkel in Hercules op heterdaad betrap.
’n Skietgeveg het uitgebreek en die rowers het weggejaag.
Botha het die vlugtende mikrobus se band pap geskiet.
Twee van die verdagtes is gewond en Botha en Weyers kon al vier verdagtes aankeer en verskeie gesteelde artikels terugkry.
Ao. Peter Smit van Vanderbijlpark in die Vaaldriehoek het in Maart 2010 opspraak gewek toe hy eiehandig ’n gewelddadige konfrontasie tussen 500 klipgooiende betogers en polisielede by Boipatong in die Vaaldriehoek ontlont en daarna voor die betogers gestap en hul optog gelei het.
Solidariteit het benadruk dat dit belangrik is om polisielede soos dié te beloon en te motiveer sodat jong polisielede hul voorbeeld kan volg en die publiek se vertroue in die polisie kan herstel.
“Dit is juis nié geharde en onsimpatieke polisielede hierdie nie.
“Dit is polisielede wat ’n besondere liefde en passie vir mense en hul gemeenskappe het,” het Du Plessis gesê.
Ao. Peet du Toit Foto: Bongiwe Gumede
Ao. Jaco Botha en reservis Gerhard Weyers Foto: Deaan Vivier
Ao. Johan Fourie Foto: Cornel van Heerden
Ao. Peter Smit Foto: Sonja van Buul