Huntley se vrou wil aansoek om asiel sien

Kaapstad. – Mnr. Brandon Huntley, die Suid-Afrikaner wat verlede week vlugte­lingstatus in Kanada gekry het, het aan die begin van hul verhouding aan sy nou vervreemde vrou gesê tussen 40 en 50 wit mense word daag­liks in Suid-Afrika vermoor.

Mev. Melanie Crete-Huntley, ’n Kanadees wat op 31 Augustus 2007 met Huntley getroud is, het in ’n telefo­niese onderhoud gesê hy het haar aanhoudend bang gepraat.

“Hy het gesê as ’n wit vrou sal ek gekaap, verkrag of aangerand word indien ek Suid-Afrika toe sou gaan.”

Crete-Huntley en Huntley is se­dert Oktober verlede jaar vervreem.

Sy het gesê sy het geweet dat hy om vlugtelingstatus aansoek sou doen, maar het nooit verwag dat hy so “disrespekvol” teenoor sy land sou wees nie.

Volgens haar was hy “sjarmant” toe hulle in 2007 ontmoet het en het sy verskriklik baie van hom gehou.

Crete-Huntley is egter nou brie­send nadat dit bekend geword het dat hy in sy aansoek om asiel gesê het sy vervreemde vrou is nie ’n “aangename mens nie”.

Volgens haar kan sy dié uitlating nie verstaan nie omdat sy hom se­dert hul troue en tot nog onlangs toe onderhou het.

“Ek het twee werke gehad om vir hom ook te kon sorg!” Sy het gesê haar vervreemde man se pa (wat in Suid-Afrika woon) het aan haar gesê sy seun maak die lewe vir hom (sy pa) baie moeilik.

Crete-Huntley gaan nou ’n dringende aansoek by die Kanadese immigrasieraad indien om sy aansoek om asiel te sien.

Sy voer aan dat hy onder inwoners van Ottawa in Kanada nou ’n “held” is en dat mense wat hulle ken, haar nou as ’n “teef” beskryf.

“Ek wil my naam skoon hê en Brandon sal moet sê hoekom hy hier­die goed van my gesê het.”

- Beeld