Hy besoek SA ná emigrasie, verdwyn
2012-01-23 22:32
- Artikelopsies
- Deel
- Kry Beeld op
“Ek is steeds hartstogtelik ’n Boer.”
Met dié woorde het prof. Chris Claassen (58), eertydse wenner van die program Flinkdink en gereelde bydraer tot Beeld se briewekolomme, sy vriende en familie gegroet voordat hy verlede Sondag spoorloos in die omgewing van die Hartbeespoortdam verdwyn het.
Claassen ly aan sistiese fibrose en het volgens sy broer, Neels, sowat 13 jaar gelede na Australië verhuis, maar Suid-Afrika onlangs op vakansie besoek.
Volgens Neels Claassen het sy broer destyds geëmigreer weens sy bekommernis oor Suid-Afrika se hoë misdaadsyfer.
’n Spesiale taakspan bestaande uit lede van die polisiedienste, die Bergklimklub van Suid-Afrika, honde-hanteerders van Rustenburg en Potchefstroom, plaaslike buurtwagte en helikopters is verlede week op die been gebring om Hartbeespoort en die Magaliesberge vir Chris Claassen te fynkam.
Neels Claassen het gistermiddag gesê dae se onverpoosde gesoek in die beboste gebied langs Hartbeespoortdam en aan die voet van die Magaliesberge het geen teken van sy broer opgelewer nie en dat die familie nou aanvaar dat Chris nie gaan
terugkom nie.
“Ek het nou ongelukkig geen verwagting dat Chris nog lewe nie,” het Neels gesê.
“Chris was die laaste tyd baie depressief en hy het geen dokumente saam met hom geneem nie. My vermoede is dat hy sy eie lewe geneem het en as ’n mens al die faktore in ag neem, blyk dit ’n baie groot waarskynlikheid te wees.”
Claassen was veronderstel om Donderdag na Australië terug te keer. Hy is egter net ná 12:00 op 15 Januarie vir die laaste keer gewaar waar hy die digte bosse in die omgewing van Schoemansville binnegestap het.
“SA in die grys gebied tussen mislukking/sukses”, sy laaste brief aan Beeld waarin hy die kernprobleem van armoede getakel het, het op 19 Januarie 2011 verskyn.