Hy word woes gelaaik op Facebook
2010-09-03 22:29
“Ek sal nooit dat my eie kinders na my musiek luister nie.”
So sê die Afrikaanse zef-rapper Jack Parow, wat beplan om ’n vloeklose weergawe van sy album uit te reik “sodat die kinders ook daarna kan luister”.
Parow, oftewel Zander Tyler (28) wanneer hy by die huis is, meen daar’s baie anties wat kla hul kinders hou van sy musiek, maar mag weens sy gevloek nie daarna luister nie.
“Ek neem hulle nie kwalik nie. Ek sal ook nie dat my eie kinders na my musiek luister nie. Daar’s baie aanvraag, daarom wil ek ’n ‘skoon’ weergawe van my CD uitbring waar die vloekwoorde uitgehaal word, soos die radiostasies dit doen, dalk ’n biep of so iets insit – die enigste f***p is dat byna die hele liedjie sal biep.”
Vir hom gaan dit nie daarom om met ’n gesuiwerde weergawe ’n groter mark vir verkope te bereik nie, maar “om my musiek vir mense van alle ouderdomme wat dit woes laaik toeganklik te maak”.
Intussen word hy so woes gelaaik op Facebook dat sy kubergewildheid bo dié van selfs gevestigde sangers soos Kurt Darren en Steve Hofmeyr styg.
Parow het meer as 78?500 Facebook-aanhangers, terwyl Hofmeyr sowat 61 000 en Darren sowat 45 000 het.
“Uiteindelik!” het Parow verheug uitgeroep oor die nuus dat hy gewilder as Darren op Facebook is.
“Dít was my enigste droom: Om Kurt Darren op Facebook te klop. Dít en om op die voorblad van Huisgenoot te wees.
“Ek’s nou klaar met rapping, my ou, nou kan ek aftree!”
Darren se jongste album het wel reeds dubbelplatinumstatus (meer as 80 000 eenhede verkoop) en Hofmeyr s’n platinumstatus bereik.
Van Parow se eerste album, Jack Parow, is meer as 35 000 eenhede reeds verkoop.
Hy het pas teruggekeer van Europa waar sy optredes in België en Nederland uitverkoop is.
“Dit was ‘amazing’ oorsee.
“By die een vertoning het daar duisende mense buite die saal gesit en luister omdat dit uitverkoop is.”
Hy is no. 4 onder MTV se top- tien gewildste sangers in albei dié lande.
“Hulle (oorsese aanhangers) hou die meeste van ‘Cooler as ekke’ en ‘ Dans dans dans’. Meer as 1,2 miljoen mense het reeds op YouTube na die musiekvideo van ‘Cooler as ekke ’ gekyk.”
Parow is vandag op Joburg Day saam met bekendes soos The Parlotones en Prime Circle te sien.
“Ek moet nog die liedjie wat ek gaan sing, ‘ I Miss’ , se lirieke leer,” het hy gisteroggend gesê.
“As ek dit nie kan onthou nie, sal ek sommer ’n ‘clipboard’ saamvat met die lirieke op en daarvan af sing.”
