In dié graf is boer gestenig
2011-08-02 00:07
MJ Lourens enJana van der Merwe
Reitz. – ’n Boer is lewend en met vasgebinde hande en voete in ’n vlak graf buite sy plaasopstal gedwing en toe met groot klippe doodgegooi.
Mnr. Thinus Uitenweerde (55) se lyk is gisteroggend ná ’n soektog deur die polisie op die plaas Aliesrust in ’n vlak graf naby die opstal gevind.
Sy vrou, Magriet, wat in die onderlyf verlam en bedlêend is, en sy bejaarde ma, Bella, is daarna deur die polisie in hul plaashuis gekry.
Die 84-jarige mev. Uitenweerde is in die aanval deur twee jong aanvallers rondgepluk, vasgebind en verder aangerand.
Albei die vroue is in die provinsiale hospitaal opgeneem vir behandeling.
Twee jeugdiges, onderskeidelik 16 en 17 jaar oud, wat albei al los werkies vir die gesin gedoen het, is enkele ure later in die woonbuurt Petsana aangekeer.
Hulle het omstreeks 13:00 op die plaas toegeslaan en die vroue is sowat 22 uur later eers gevind.
Twee selfone, ’n hoëtroustel en die vermoorde se beursie is in die twee se besit gekry.
Die Bethlehemse honde-eenheid van die polisie het ondersoek ingestel nadat mnr. Uitenweerde se seun, Martin, wat in Bethlehem bly, sy pa en ouma probeer bel het.
Toe Uitenweerde jr. later by die plaas opdaag, was die polisie reeds daar. Hy het gehoor hoe sy ma vanuit die huis om hulp roep. Sy pa was vermis.
Uitenweerde se lyk is laat die oggend sowat 100 m van die huis by ’n murasie gekry. Die aanvallers het die graf met blare en stokke probeer versteek.
Die agterkant van Uitenweerde se skedel is vermoedelik met van die groot klippe van die murasie verbrysel. Sy voete is vasgebind met ’n swart veter, sy hande met ’n nylontou en daar was ’n serp om sy gesig.
Uitenweerde jr. het in trane uitgebars toe die polisie aan hom sê hulle het sy pa se lyk gekry.
“My pa was ’n mens op sy eie; ’n behulpsame man. Hy sou enigiemand help as dit vir hom moontlik was.”
Die plaas Alies rust in die Reitz-distrik waar mnr. Thinus Uitenweerde vermoor en sy vrou en ma aangehou en aangerand is.
Martin Uitenweerde, seun van die vermoorde mnr. Thinus Uitenweerde
DIE wreedaardige plaasaanval, enkele dae na die Lindley-uitspraak, het skokgolwe deur die gemeenskap van Reitz, ’n buurdorp, gestuur.
Foto's: MJ Lourens