Inbreker vas; hy dra Bok-baadjie

’n Vermeende inbreker is op heterdaad betrap in ’n Springbok-baadjie wat hy drie dae vantevore gesteel het.

Die man is eergisteroggend in ’n plaashuis buite Hekpoort betrap danksy die gemeenskap en die Hekpoort-polisie se vinnige reaksie.

’n Polisiebeampte na aan die ondersoek het gister gesê buiten vir dié twee inbrake by plaashuise in dié omgewing, was daar ook twee lasbriewe uitgereik vir sy inhegtenisneming.

Hy is gesoek weens klagte van huisbraak met die opset om te steel en diefstal, asook die besit van vermoedelik gesteelde goedere.

Mnr. Johan Oosthuizen van Oostermoed-boerdery het gesê sy bure het eergisteroggend kerk toe gegaan.

Hul werker is na die plaashuis om die honde kos te gee toe hy iets verdags by die huis opmerk.

Die werker het Oosthuizen se ander buurman, wat op pad was Krugersdorp toe, gebel. Dié het by die polisiekantoor omgery om hulle in te lig en terselfdertyd vir Oosthuizen gebel.

“Ek het verlede maand my eie veiligheidsmaatskappy begin. Die misdaad in ons omgewing is erg genoeg dat ek ’n veiligheidsmaatskappy moes stig,” het Oosthuizen gesê.

“My mense en die polisie het gelyk by die plaashuis aangekom. My veiligheidshoof het by die huis ingegaan en die inbreker betrap waar hy my buurvrou se kamer omgooi.

“Die inbreker het ’n Springbok-baadjie en vrouejuwele gedra.

“Die man het ’n mes by hom gehad, maar my veiligheidshoof se haelgeweer het hom afgeskrik.”

Die polisiebeampte het gesê die Springbok-baadjie behoort aan ’n vrou van Hekpoort wat dit vir skiet verwerf het.

Die man het die baadjie, haar juwele en nog goedere verlede Donderdag uit haar huis gesteel.

Volgens die beampte verskyn die vermeende inbreker (36) na verwagting vandag op twee aanklagte van huisbraak met die opset om te steel en diefstal in die landdroshof in Magaliesburg.