‘Is dít wat jy wil hê, Julius?’ vra dominee ná aanval
2010-03-26 10:33
Buks Viljoen
“Is dít wat jy bedoel met jou gewraakte uitlatings oor aanvalle op wittes, mnr. Julius Malema?”
Dit is wat ds. Gerrie Strydom wil weet nadat sy skoonpa, mnr. Stuart Jonker (81), eergister genadeloos op sy plaas buite Nelspruit aangerand is.
Mnr. Jonker en sy lewensmaat, mev. Tina Muller (82), is in hul opstal by die Ooswes-boerdery naby Sterkspruit oorval.
“Ek het die afgelope twee weke te veel van hierdie onsinnige geweld gesien,” het Strydom gister aan Beeld gesê.
Hy was verlede Vrydag een van die predikante wat by die begrafnisdiens van die 17-jarige Anika Smit van Pretoria opgetree het. Anika is in haar pa se huis in Theresapark vermoor en haar hande is afgesny.
In Woensdagoggend se aanval het Jonker omstreeks 02:00 wakker geword van die geraas toe drie aanvallers die huis se voordeur gebreek het.
“Hy is met ’n stuk hout en ’n ysterpaal geslaan. Jy kan nie glo hoe die ou man se lyf lyk van die bloukolle nie.”
Muller word steeds in die waaksorgeenheid van die Nelspruit Medi-Clinic behandel.
Volgens Strydom is sy steeds kritiek, maar stabiel. “Die bloeding op haar brein is gedreineer en sy het darem nou bygekom.”
Muller se kakebeen is ook gebreek toe sy waarskynlik met dieselfde stuk hout teen die kop geslaan is.
Strydom sê dit grief hom om soveel sinnelose geweld te beleef.
“Twee weke gelede het ek ’n man in Pretoria begrawe wat vermoor is. Verlede Vrydag het ons by die graf van die jong Anika gestaan.”
Die tyd het volgens Strydom aangebreek dat politici moet begin besef wat die gevolge is van onverantwoordelike uitlatings wat hulle oor geweld maak.
“Die ANC moet sy lakeie tot orde roep – en dringend!”
Malema, leier van die ANC se jeugliga, het onlangs op ’n studentebyeenkoms in Johannesburg die lied “Skiet die Boere” gesing, en dit sedertdien ondanks heftige kritiek en verskeie klagtes herhaal.
Nog niemand is in verband met die aanval op Jonker en Muller aangekeer nie, het insp. Dawie Pretorius, polisiewoordvoerder in Nelspruit, gesê.