Joost wou Kurt bydam oor Amor
2012-02-19 22:17
- Artikelopsies
- Deel
- Kry Beeld op
Daar was so hittete ’n vuis-geveg tussen die oud-Springbok-kaptein Joost van der Westhuizen en die sanger Kurt Darren toe Van der Westhuizen Darren en Amor Vittone een nag in laasgenoemde se huis “gekonfronteer” het.
“Joost het op ons afgestorm en hy was woedend,” het Darren, wat gister verjaar het, vertel.
“Ek het hom vriendelik daaraan herinner dat hy my gevra het om ná ’n geselligheid waar ons albei was agter haar aan te ry huis toe om te sien dat sy veilig tuis aankom omdat sy ’n bietjie erg gekuier het.”
Darren het sy verjaardag met gemengde gevoelens gevier.
“Ek is baie teleurgesteld dat ek nou by Joost en Amor se openbare gevegte en publisiteitsbeheptheid betrek word. Ja, ek was daardie betrokke aand waarvan Joost in die jongste uitgawe van Huisgenoot vertel saam met Amor in haar huis in Dainfern in Johannesburg.
Die egpaar was toe nog saam, maar Joost was by ’n ‘manne-aand’ in Brits.
By hul huis aangekom, het sy my gevra of ek vinnig wil gaan kyk na al haar en Joost se toekennings.
Die huishulp, ek en Amor het na die betrokke kamer gegaan toe Joost erg kwaad daar instorm. Kan jy glo dat hy nou, ná al die jare, sê ek het Amor omhels; dit nogal terwyl die huishulp toekyk?
“Ek vind Amor nie eens aantreklik nie en ek wil absoluut niks met hulle te doen hê nie.”
Vittone, wat sedert Vrydag nie gereageer het op Beeld se versoeke om kommentaar nie, het verlede week haar derde prokureur in haar egskeidingsgeding met Van der Westhuizen aangestel.
Mnr. Selwyn Shapiro het gister gesê hy kan geen kommentaar lewer nie.
“Al wat ek wel kan sê is dat van ons kant af probeer ons die egskeiding bespoedig.”
Mnr. Robert Klinkenberg, Van der Westhuizen se prokureur, het gesê die vertraging “is beslis nie ons skuld nie”.
Van der Westhuizen is in Dubai vir ’n geldinsamelingsveldtog vir J9, sy liefdadigheidsorganisasie.
Sluit aan by Beeld se Facebook-bladsy en volg Beeld
op Twitter