‘Jou huis brand’ klink soos ’n grap
2010-09-07 22:08
‘Dit is nie ’n baie ‘nice’ grap nie.”
Dit is wat mnr. André Kotzé van Constantiapark in die ooste van Pretoria aan ’n brandweerman gesê het toe dié hom bel met die nuus dat sy huurhuis pas tot op die grond afgebrand het.
Kotzé, sy vrou, Christelle (33), en hul tweejarige tweelingdogters, Denike en Dané, het Saterdagmiddag by familielede in Faerie Glen gekuier toe die huis afgebrand het.
Hul bure kon hul hond, Tiekie, uit die brandende huis red.
“Die bure sê die oomblik toe hulle Tiekie uit die huis gekry het, het die vensters begin bars.
Hulle sê binne 20 minute was ons huis tot op die grond toe afgebrand,” het Kotzé gister vertel.
Volgens Kotzé het hy ’n oproep van ’n man gekry wat gesê het: “My naam is André en ek is ’n brandweerman. Jul huis het so pas afgebrand.”
“Ek het vir die ou gesê dit is nie ’n baie ‘nice’ grap nie en wou by hom weet wie hy nou eintlik is.
Toe hy aanhou met die storie het ek die foon doodgedruk en in my motor gespring op pad na my huis.
“Toe ons daar opdaag, het net die mure gestaan.”
Volgens die brandweer se voorlopige verslag het die brand in die motorhuis by die kragboks begin waarna dit deur die dak na die res van die huis versprei het, het Kotzé gesê.
“Ek is net dankbaar ons was nie in die huis nie en dat dit nie in die nag gebrand het nie, want dan sou ons dalk nie nou hier gesit het nie,” het mev. Kotzé gesê.
Mnr. Kotzé het gesê die brand is ’n baie groot terugslag vir hulle, veral omdat hulle nog meer as R20 000 skuld aan mediese koste vir Dané, wat aan die siekte hemagioom ly.
By geboorte is ’n gewas in haar keel ontdek wat veroorsaak het dat sy nie kon asemhaal nie.
Dokters moes destyds ’n kunsmatige opening in haar nek maak.
Dané het al sowat vyf operasies ondergaan. Hoewel die gewas nou gekrimp het, kan dit later weer probleme veroorsaak.
Gewasse het nou ook in haar linkeroog en op haar arms en bene begin groei.
Die gesin het nie geld vir die nuwe behandeling nie.
“Noudat ons huis afgebrand het, het ons niks,” het mnr. Kotzé gesê.
Die gesin woon tans by mev. Kotzé se suster, mev. Elzanne Botha, in Faerie Glen.
Familielede en vriende het hulle ou klere gegee.
Mev. Kotzé het gesê sy is dankbaar dat hulle leef, maar net baie hartseer oor al hul foto’s en ’n trouring wat sy van haar ouma geërf het wat in die brand verwoes is.
Die Kotzé-egpaar en hul tweelingdogters, Denike (links) en Dané. Foto: Alet Pretorius
Dankbaar dat hulle leef: Mnr. André en mev. Christelle Kotzé en hul tweelingdogters, Denike (voor) en Dané. Foto: Alet Pretorius