Julle mag nie hier wei nie! Skut toe!
2011-07-14 00:00
- Artikelopsies
- Deel
- Kry Beeld op
Vier draadskape en drie draad-lammers is deur die Johannesburgse metropolisie gekonfiskeer en word in die diereskut aangehou.
Metropolisielede het die skape opgepik en die maatskappy Bang & Olufsen met R2 000 beboet omdat hulle met skape handel dryf “in ’n park of tuin waar die publiek reg op toegang het”.
Bang & Olufsen is ’n onderneming wat luukse elektroniese ware verskaf en die skape van draad en krale “wei” op die grasperk voor die onderneming in Peter Place, Sandton.
Mnr. Mike Sharp, bestuurder van die tak, sê die metropolisie het verlede Woensdag beslag gelê op hul sewe skape en die boete aan ’n veiligheidswag gegee.
“Hulle het gesê ons dryf handel in skape. Hulle het nooit met ons kom praat voordat hulle die skape gevat het nie.”
Volgens hom is Bang & Olufsen se hoofkantoor in Denemarke op die platteland. Skape en ander diere wei om die gebou.
“Ons het daarom gedink dit sal ’n goeie idee wees om die draadskape op die grasperk voor ons gebou te sit.”
Hulle het die eerste twee skape twee jaar gelede gekoop en sedertdien nog vyf bygekry.
Sharp sê hul kliënte en mense in die omgewing is gaande oor die skape en hulle het ’n instelling daar geword.
Die skape word nie verkoop nie.
Sharp het die metropolisie gisteroggend gebel om die skape terug te kry.
“(Hoofsupt.) Wayne Minnaar (metropolisiewoordvoerder) het verduidelik waarom die skape gevat is. Hy kon net nie verstaan hulle is net as versiering daar nie.”
Volgens Sharp het hy ook gepraat met dir. Gerrie Gerneke, die metropolisie se direkteur van lisensiëring en vervolging, wat die saak sal ondersoek. Hulle hoef voorlopig nie die R2 000 te betaal nie.
Die skape word in die munisipale skut in Randburg gehou.
Minnaar het by navraag gesê die skape mag nie op die gras voor die gebou vertoon of verkoop word nie.
Die skape van draad en krale voor Bang & Olufsen se gebou wat gekonfiskeer is omdat die metropolisie dink die maatskappy dryf handel daarin.