Inkomstebelasting daal effens
2012-02-22 14:09
- Artikelopsies
- Deel
- Kry Beeld op
Johannesburg. — Rokers en drinkers gaan soos gewoonlik meer vir hul
slegte gewoontes betaal en individue kry die normale verligting in persoonlike
inkomstebelasting om vir inflasie te vergoed, maar belasting op winste gemaak
uit kapitale bates gaan toeneem.
Die begroting maak voorsiening vir verligting in persoonlike
inkomstebelasting van R9,5 miljard, het mnr. Pravin Gordhan, minister van
finansies, gesê, wat die effek van inflasie in ag neem en is ’n effense beskeie
reële belastingverligting.
Gordhan het aangekondig dat die nuwe dividendbelasting hoër gaan
wees as die sekondêre belasting op maatskappye wat dit vervang. Individue en
maatskappye gaan ook meer belasting betaal op kapitaalwinste.
Volgens die belastingoorsig gaan die hervormings die regverdigheid
van die belastingstelsel verbeter en verseker dat inkomste van kapitaal meer
toepaslik belas word.
Dividendbelasting
Die belasting sal ingestel word teen ’n koers van 15%. Vanaf 1
April vervang dit sekondêre belasting op maatskappye, wat voorheen 10%
was.
Kapitaalwinsbelasting (KWB)
Die koers vir individue en spesiale trusts verhoog vanaf 1 Maart
van 25% na 33,3% en vir maatskappye en ander trusts van 50% na 66,6%. Die
verskeie uitsluitingsdrempels is verhoog om die effek op middel-inkomste
verdieners te beperk, het Gordhan gesê.
Aftreevoorsiening en besparing ("Retirement funding and
savings")
Gordhan het gesê om vrywillige besparing aan te moedig
word ’n
belastingvrye kort- en mediumtermyn-spaarproduk oorweeg. Die voorstel is
dat
individue toegelaat moet word om R30 000 per jaar te spaar, met ’n
lewestydperk-beperking van R500 000, in geregistreerde spaar of
beleggingsprodukte wat vry
sal wees van belasting op rente, dividend of kapitaalwins.
Daar is ook veranderinge aan die hantering van bydraes tot
pensioen- en voorsorgfondse bekend gemaak. Individue se aftrekkings sal 22,5% en
27,5% wees vir mense onderskeidelik onder 45 en bo 45. Jaarlikse aftrekkings sal
onderskeidelik beperk wees tot R250 000 en R300 000.
Klein ondernemings
Die belastingvrye drempel vir kleinsake-korporasies ("Small business
corporations") word tot R63 556 verhoog. Die koers van 10% is tot 7% verlaag en
die is van toepassing tot R350 000. Vir belasbare inkomste bo R350 000 sal die
normale koers van 28% van toepassing wees.
Aksynsbelasting
’n Pakkie 20-sigarette sal vanjaar 58c meer kos, terwyl ’n liter
wyn 18c meer sal wees. ’n340ml blikkie bier gaan jou 9c meer uit die sak jaag,
terwyl ’n 750ml bottel spiritualieë R6 meer sal wees.