‘Jy het nie meer ’n man nie,’ sê boewe aan vrou
2010-01-24 23:42
Bloemfontein. – ’n Afgetrede doktor in chemie is met ’n groot rots teen die kop geslaan, sy keel is afgesny en hy is met ’n skerp voorwerp gesteek.
Dr. Ernest Giesekke (69) se lyk is gisteroggend op die plaas Goodhope naby Ficksburg gekry.
Die moordenaars het net R50 en ’n selfoon gesteel.
Drie verdagtes is sowat ses uur ná die aanval in hegtenis geneem nadat plaaslike inwoners en die polisie saamgewerk het.
Giesekke se vrou, Eve (77), het in die bed gebly toe haar man om 05:45 uit die huis is om beeste te voer en vas te stel of die besproeiingstelsels werk.
Die Giesekke-egpaar verbou laventel en bessies, berig Gavin Boy.
Giesekke is by die watertenk op die plaaswerf vermoor. Hy is met ’n rots teen die kop geslaan, hy is gesteek en sy keel is afgesny.
Die moordenaars het daarna die plaashuis ingegaan en mev. Giesekke in die slaapkamer oorval.
Sy het aan hulle gevra waar haar man is. Een van die aanvallers het gesê: “Jy het nie meer ’n man nie.”
Sr.supt. Mptantsi Makhele, polisiewoordvoerder, het gesê die mans het geld en wapens geëis, maar is met net mev. Giesekke se handsak en selfoon weg. Daar was R50 in die handsak.
Giesekke het daarna die noodknoppie van die alarmstelsel gedruk.
Die eerste mense op die toneel was mnr. James Brown, eienaar van Alarm Security. Hy het op die lyk afgekom.
Die polisie en lede van die Gumtree-boerevereniging en die Ficksburg-veiligheid-en-sekuriteitskomitee het onmiddellik by die soektog betrokke geraak.
Na verneem word is die elektriese heining om die Giesekkes se plaaswerf verlede week geknip.
Die aanvallers is toe vermoedelik betyds verwilder.
Die geknipte drade was na verneem word nie aangemeld nie.
Giesekke is die derde Ficksburgse boer wat die afgelope twee jaar vermoor is.