KZN kort R874 m. vir herstel van vloedskade
2012-02-06 22:02
- Artikelopsies
- Deel
- Kry Beeld op
Durban. – KwaZulu-Natal se vervoerdepartement stuur af op ’n begrotingstekort van sowat R874 miljoen met herstelwerk van minstens R1,4 miljard se vloedskade aan die provinsie se paaie die afgelope drie jaar.
Van dié herstelwerk hou verband met skade wat al in 2008 aangerig is toe verwoestende storms die KwaZulu-Natalse kus getref het. R1,1 miljard se skade is toe aan paaie en brûe aangerig.
Tussen November 2009 en Januarie 2010 is ’n verdere R312 miljoen se stormskade aangerig en miljoene rande se skade is begin vanjaar weer aangerig toe ’n verwoestende storm die uMzinyathi-distrik getref en die Tugelarivier laat oorstroom het.
Die provinsiale vervoerdepartement het einde verlede jaar al die wetgewer se portefeuljekomitee oor finansies gewaarsku dat hy te min rampfondse ontvang het om die stormskade te herstel.
As gevolg van dié toedrag van sake het die departement ’n oudit laat doen om sy prioriteite te bepaal, is gister bekend gemaak.
In die volgende twee maande tot die einde van die huidige boekjaar gaan voorrang gegee word aan die herstel van vloedskade, die instandhouding van bestaande paaie en die bou van voetgangerbrûe sodat mense riviere in vloed veilig kan oorsteek.
Die herstel van beskadigde paaie sluit in 1 500 km se grondpaaie in plattelandse gebiede.
Naas 12 voetgangerbrûe, het die departement ook begroot vir vyf nuwe brûe vir voertuie om te keer dat vloede die provinsie se ekonomie verlam.
Omdat rampfondse tekort geskiet het, moes die provinsiale vervoerdepartement geld uit sy normale begroting gebruik om vloedskade te herstel.
Mnr. Chris Hlabisa, hoof van die departement, het egter gister die versekering gegee dat die departement nie sy teikens vir die bou van nuwe teerpaaie in hoofsaaklik plattelandse gebiede gaan afskaal nie.
Die KwaZulu-Natalse regering is sowat ’n dekade lank al besig om teerpaaie in plattelandse gebiede te bou om dié arm dele van die provinsie vir ekonomiese ontwikkeling te ontsluit.
Mnr. Kwanele Ncalane, departementele woordvoerder, het gesê die departement is besig om met die provinsiale tesourie en die nasionale regering te onderhandel om meer geld te bekom.
“Daar is geen planne om ons teikens vir die opgradering van paaie vir die komende boekjaar af te skaal nie,” het Ncalane gesê.