Kapers skiet dokter
2012-01-29 21:31
- Artikelopsies
- Deel
- Kry Beeld op
’n Gerespekteerde dermatoloog wat Vrydagaand in Riviera, Pretoria, koelbloedig deur kapers doodgeskiet is, het minute voor sy dood nog oor die foon aan sy vrou gesê hy is op pad huis toe.
“Ons gaan gewoonlik op ’n Vrydagaand uit, maar hy het laat gewerk en my om 19:55 gebel om te sê ons moet nog nie gaan slaap nie, want hy gaan amper huis toe ry,” het me. Brenda Moche (40) gister gesê.
Haar man, dr. John Moche (41), wat hoof was van die Steve Biko-hospitaal se dermatologie-eenheid, is Vrydag omstreeks 20:30 voor ’n woonstelgebou in Viljoenstraat deur kapers oorval en doodgeskiet.
Lt.kol. Lungelo Dlamini, provinsiale polisiewoordvoerder, het gesê Moche en ’n 33-jarige verpleegster was in dié straat, skaars ’n kilometer van die hospitaal, besig om voor die gebou in sy splinternuwe Range Rover-motor te gesels toe ’n bende kapers die deure ooppluk en hulle uit die voertuig trek.
Die kapers was met .38 Special-rewolwers gewapen.
“Een van die kapers het dr. Moche in sy linkerbors geskiet,” het Dlamini gesê.
Die kapers het met die Range Rover weggejaag.
“Paramedici is na die toneel ontbied, maar Moche is op die toneel dood,” het Dlamini gesê.
Die Range Rover, wat Moche maar sowat twee weke gelede gekoop het, is later dieselfde aand verlate in Atteridgeville gevind.
Dlamini het gesê die verpleegster is erg getraumatiseer.
Die polisie kon daarom nog nie haar verklaring neem nie.
Dr. Ernest Kenoshi, uitvoerende hoof van die Steve Biko-hospitaal en ’n vriend van Moche, het gesê dit is moontlik dat Moche die verpleegster ’n saamrygeleentheid gegee het omdat baie van die hospitaalpersoneel in woonstelgeboue naby die hospitaal, onder meer in dié straat, woon.
“Dit is vir my ’n groot skok, want ek het kort voor 20:00 nog lank met hom op die foon gepraat oor verskeie kwessies,” het Kenoshi, wat dié aand ook laat gewerk het, gister gesê.
“Hy het om 20:01 vir my twee e-posse gestuur oor die kwessies wat ons bespreek het. Om 20:50 het ek ’n oproep gekry dat hy geskiet is en in Viljoenstraat lê.”
Kenoshi het hom na die toneel gehaas.
“Die paramedici was reeds besig om hom te probeer bybring, maar hy het geen polsslag gehad nie. Hulle het byna ’n uur lank probeer om sy lewe te red, maar hy is omstreeks 21:30 dood verklaar.”
Kenoshi het gesê hy het Moche goed leer ken sedert hy hom in 2009 as hoof van die dermatologie-eenheid aangestel het.
“Ek het dikwels saam met hom gholf gespeel. Hy was een van die hospitaal se sterre en het nog ’n blink toekoms voor hom gehad.”
Mev. Moche het gesê hul twee dogters, Koketso (21) en Masego (14), en hul seun, Bokang (7), is verpletter deur hul pa se dood en ontvang berading van ’n sielkundige.
“Ek ken hom vandat ek 15 jaar oud is en ons was 12 jaar getroud. Ons het basies ons hele lewe saam bestee.
Hy was ’n baie toegewyde, liefdevolle mens en ’n absoluut wonderlike man.”
Die kapers is nog voortvlugtig.