Kind 3 tone kwyt op roltrap

’n Sesjarige meisie van aManzimtoti het drie van haar tone in ’n roltrapongeluk by ’n winkelsentrum verloor.

Mishke Roux was Sondag saam met haar ma, Mariska, in die Galleria Mall in dié dorp aan die KwaZulu-Natalse suidkus toe die ongeluk gebeur het.

Drie van haar tone is afgesit en sy het ook kneusings aan haar linkersy opgedoen.

“Ek het net van die roltrap afgeklim en was ’n paar treë weg toe ek die meisietjie se bloed­stollende geskree hoor,” ’n omstander in die winkelsentrum vertel.

Me. Swastika Juggernath, woordvoerder van die winkelsentrum, het gesê kringtelevisie-beeldmateriaal wys hoe Mishke en haar ma van die bankgang af met die roltrap afloop.

“Iemand op die roltrap het die noodknoppie gedruk en toe die roltrap stop, was hulle aan die onderpunt. Dit het in ’n breukdeel van ’n sekonde gebeur.”

Mishke se linkervoet het tussen die kant van ’n trap van die roltrap en die glas vasgesit.

Die meisie sal na verwagting vandag weer geopereer word.

’n Familievriend het aan Beeld gesê dit gaan goed met Mishke.

“Sy is ’n sterk meisie en opgeruimd. Sy sê wel haar voet is seer en die dokter gee vir haar baie medikasie.”

Mishke, ’n gr. 1-leerling aan die Kuswag Skool, kry berading en haar ma, pa of grootouers is heeltyd by haar, het die vriend gesê.

Die Roux-gesin wou nie gister oor die voorval praat nie. Hulle het gesê hulle is besig om oor die traumatiese voorval te kom.

Hulle sal volgens die vriend na verwagting ’n verklaring uitreik sodra Mishke se behandeling voltooi is.

“Die gesin wil almal vir al hul hulp en gebede bedank.”

’n Spesiale Facebook-blad is opgestel om haar vriende en familie op die hoogte van haar vordering te hou.

Juggernath het gesê daar is kennisgewingborde wat mense waarsku om die roltrappe nie kaalvoet te gebruik nie.

“Ons voldoen aan die Wet op Beroepsgesondheid en -veiligheid. Naas die gevaar om op die roltrappe vas te sit, is dit elektroniese toerusting en niemand moet hoegenaamd kaalvoet daarop wees nie.”