Landdros ‘weet nie van klagte’

Die hooflanddros in Lichtenburg teen wie verskeie klagte van wangedrag ondersoek word, beweer hy is nie bewus van so ’n ondersoek teen hom nie.

Landdros I.W.O. Morake het vandeesweek in dieselde asem aan Beeld gesê die ondersoek teen hom is sub judice en dat die koerant eerder by die Landdrostekommissie navraag moet doen. Morake het die oproep toe gou beëindig en gesê hy het voorbereidingswerk om te doen.

Mnr. Danie Schoeman, sekretaris van die Landdrostekommissie, het vroeër bevestig dat die kommissie verskeie klagte teen Morake ondersoek.

Hy kan nie nou meer besonderhede oor die aard van die klagte bekend maak nie omdat die kommissie se etiese komitee eers aanbevelings moet doen oor of Morake voor die Landdrostekommissie aangekla sal word.

Dis nog nie seker wanneer dié aanbevelings gedoen gaan word nie, het Schoeman gesê.

Beeld het intussen verneem die klagte teen Morake hou daarmee verband dat hy mense wat ander geld skuld, na bewering geïntimideer en gedreig het. Volgens Beeld se bron het Morake dié mense glo ontbied om hom te kom spreek, ook van gebiede buite sy jurisdiksie.

Hy het hulle dan na bewering met arrestasie gedreig indien hulle nie hul skuld betaal nie sonder dat daar sprake van strafregtelike prosedures was.

Morake het na bewering ook van die geld ontvang wat geskuld is.

In sommige gevalle het die mense aan wie die geld geskuld is, die geld glo nooit van Morake ontvang nie.

Beeld verneem daar is ’n strafregtelike saak en siviele geding teen Morake hangende. Schoeman het vroeër bevestig Morake is die beskuldigde in ’n strafregtelike saak.

Die kommissie kan egter nie klagte wat met dié saak of die siviele geding verband hou, ondersoek voordat die onderskeie hofsake afgehandel is nie, het Schoeman gesê.

“Ons moet dus eers wag om te kyk of hy skuldig of onskuldig bevind word. Dit help nie ons doen ’n hele ondersoek en dan bevind die hof hy is onskuldig nie.”